នៅក្នុងកំឡុងពេលដែលអ្នកមានគភ៌ ស្ត្រីភាគច្រើនស្រលាញ់កូន ខ្លាចកូនរលាក់ ឬខ្លាចបាត់បង់កូន ពួកគាត់មិនហ៊ានសូម្បីតែដើរ ឬ ធ្វើលំហាត់ប្រាណធ្ងន់ៗ ហើយបើសិនជាម្តាយក្មេក ស្រលាញ់ទៀត កុំថាឡើយធ្វើការធ្ងន់ ចុះពីគ្រែនឹងមិនព្រមចុះផង មើលទៅ។ ការពិតទៅ នៅពេលអ្នកមានគភ៌ ការហាត់ប្រាណគឺជារឿងមួយដ៏សំខាន់ សំរាប់ជួយ ទាំងខាងម្តាយ ទាំងខាងកូន វាអាចទប់ទល់នឹងអ្វីផ្សេងៗដែលអាក្រក់សំរាប់ម្តាយ និង កូននាពេលអនាគត។
តើការហាត់ប្រាណអ្វីខ្លះដែលអាចហាត់បានក្នុងកំឡុងពេលមានផ្ទៃពោះ?
ការហែលទឹក ៖ ចំពោះអ្នកដែលចេះហែលទឹកគួរតែបន្តការហែលទឹកនៅពេលមានគភ៌ វាអាចជួយ អោយចលនាដង្ហើមរបស់អ្នកបានល្អ ចលនាបេះដូងដើរបានស្រួល ផ្លូវឈាម ជួយអោយសាច់ដុំអ្នកតឹងល្អ និង ខ្លាំង អាចកាត់បន្ថយការឈឺចាប់បានតិចតួចពេលសំរាល ហើយមួយទៀតទឹកអាចជួយទ្រទំងន់កូនអ្នកបានខ្លះ ជួយបន្ធូរសំពាធក្នុងពោះអ្នកបានខ្លះ។
យ៉ូហ្គា ៖ ភាគច្រើននៅបរទេស អ្នកមានគភ៌ គេតែងតែអោយទៅហាត់យ៉ូហ្គាជាមួយស្វាមីរបស់គេជាគូ ដូចនេះហើយ យ៉ូហ្កា ជាលំហាត់ប្រាណមួយដែលអាចជួយអ្នកបានល្អ វាមានផលប្រយោជន៍ដូចជា ជួយអោយអ្នកគេងលក់ស្រួល បន្ថយស្ត្រេស និងភាពភ័យខ្លាច ជួយអោយអ្នកបាត់បង់នូវភាពចាញ់កូនខ្លះៗបាន។
ធាក់កង់ និង រត់ត្រឹកៗ ៖ មានគភ៌អញ្ចឹងគួរតែហាត់ធាក់កង់ និង រត់នៅនឹងមួយកន្លែងដើម្បីជៀសវាងគ្រោះថ្នាក់ផ្សេងៗជាយថាហេតុ។ ការរត់ និង ធាក់កង់មិនបង្ខំ កុំលឿនពេក។ វាអាចជួយកុំអោយម្តាយលើសទំងន់ ដែលជាហេតុមួយនៃការជួបនឹងជំងឺផ្សេងៗ ដូចជា ទឹកនោមផ្អែម ជំងឺ បេះដូង។ល។
ការលើកទំងន់ ៖ វាជួយអោយសាច់ដុំអ្នកមានភាពល្អសំរាប់ធ្វើការសំរាល ជួយអ្នករក្សានូវ ទំងន់ដែលអ្នកចង់បាន។ ប៉ុន្តែសូមកុំលើកធ្ងន់ពេក នឹង សូមកុំលើកក្នុងកាយវិការដេក អ្នកអាចអង្គុយឬឈរបាន។
អ្នកត្រូវបញ្ឈប់ការហាត់ប្រាណនៅពេលដែល៖
- ពេលដែលឈឺពោះសំរាល
- ពេលឈឺទ្រូង
- វិលមុខ
- កូនក្នុងពោះមិនសូវកំរើកដូចមុន
- ឈឺក្បាល
- ឈឺសាច់ដុំ
- មានទឹកចេញតាមប្រដាប់ភេទអ្នក ឬ ឈាម
សរុបមក ការហាត់ប្រាណកំឡុងមានផ្ទៃពោះ អាចជួយអ្នកបានច្រើន ដូចជា សំរួលអារម្មណ៍ បង្កើនថាមពល ជួយថែរក្សាកំរិតជាតិស្ករអោយនៅល្អ អាចត្រៀមខ្លួនសំរាប់សំរាល និង មានកូនដែលមានសុខភាពល្អ។
