photography | KhmerLife.style

ក្រុមហ៊ុន GoPro បានដាក់លក់ឧបករណ៍ Karma’s Stabilizer Grip ដោយឡែក ក្នុងតម្លៃ $300

05/12/2016

ដង Karma’s stabilizer grip របស់ក្រុមហ៊ុន GoPro | ប្រភពពីវែបសាយ GoPro

ក្រុមហ៊ុន GoPro បានធ្វើការហៅប្រមូលយកផលិតផល Karma Drone របស់ពួកគេត្រឡប់ទៅវិញ ដោយសារតែបញ្ហាមួយចំនួន ក៏ប៉ុន្តែពួកគេនឹងដាក់លក់ដង Karma Stabilizer Grip ដោយឡែកតែវាក្នុងតម្លៃ $300 ដែលដើមឡើយ ត្រូវបានដាក់លក់ជាកញ្ចប់រួមក្នុងប្រអប់ជាមួយ Karma Drone នោះ។ ជាមួយនឹងដង Stabilizer Grip នេះ អ្នកនឹងអាចថតវីដេអូយ៉ាងរលូន មិនសូវរង្គើរខ្លាំងជាមួយ GoPro របស់អ្នក បើទោះបីជាអ្នកកាន់នៅនឹងដៃក៏ដោយ។

ដង Karma’s stabilizer grip របស់ក្រុមហ៊ុន GoPro | ប្រភពពីវែបសាយ Engadget

ដង Karma stabilizer grip នេះ អាចប្រើបានជាមួយនឹង GoPro Hero 5 Black ដោយមិនចាំបាច់មានអ្វីបន្ថែមនោះទេ ក៏ប៉ុន្តែបើអ្នកចង់ប្រើវាជាមួយនឹង GoPro Hero 4 Black/Silver អ្នកប្រហែលជាត្រូវទិញនូវប្រដាប់រណបភ្ជាប់ (harness) ក្នុងតម្លៃ $30 បន្ថែមទៀត ទើបអាចប្រើជាមួយនឹងដង grip នេះបាន។ បន្ថែមពីនេះ អ្នកក៏អាចបន្ថែមនូវប្រដាប់ភ្ជាប់ផ្សេងៗទៀត ដែលអាចប្រើជាមួយនឹងដង stabilizer grip នេះ ដែលអ្នកអាចពាក់ជាប់នូវនឹងខ្លួនរបស់អ្នកបាន ជាពិសេសនៅពេលអ្នកលេងកីឡា ឬជិះម៉ូតូ កង់ ជាដើម ដូច្នេះអ្នកអាចប្រើដៃរបស់អ្នកធ្វើអ្វីផ្សេងបានក្នុងកីឡា ដែលអ្នកលេង។

ប្រដាប់រណបភ្ជាប (harness) សម្រាប់ប្រើជាមួយ Hero 4 Black/Silver | ប្រភពពីវែបសាយ GoPro

ដង Karma Stabilizer grip និងប្រដាប់ភ្ជាប់ផ្សេងៗទាំងអស់ គឺមានលក់ក្នុងទីផ្សារហើយ ក៏ប៉ុន្តែបើអ្នកមាន GoPro Hero 5 Session អ្នកប្រហែលជាត្រូវចាំរហូតដល់ពាក់កណ្ដាលឆ្នាំ 2017 ទើបអាចប្រើវាបាន ព្រោះថាឥឡូវនេះ នៅមិនទាន់មានប្រដាប់រណបភ្ជាប់ សម្រាប់ Hero 5 Session ជាមួយនឹងដង grip នេះនៅឡើយទេ។

អានបន្ត

Like 743

កាមេរ៉ា medium format H6D ថ្មីរបស់ Hasselblad

បច្ចេកវិទ្យា

10/04/2016

សំរាប់ ការរំលឹកអនុស្សារីយ៍ទី 75 នៃ ក្រុមហ៊ុន Hasselblad ដែលជាក្រុមហ៊ុនផលិតកាមេរ៉ា medium format ពួកគេបានបោះបង់ចោលនូវ កាមេរ៉ាប្រភេទចាស់ៗរបស់ពួកគេព្រមទាំងបានបង្កើតនូវកាមេរ៉ាថ្មី ដែលមាន ម៉ូដែល H6D។ ហេតុអ្វីបានគេបោះបង់ចោលនូលកាមេរ៉ា ចាស់ៗរបស់ពួកគេ មកពី ឥឡូវនេះក្រុមហ៊ុន Canon និង nikon កំពុងតែចាប់ផ្តើមបង្កើត DSLR ដែលអាចមានចំនួន Megapixel បានធំជាង ពពួកmedium format របស់ពួកគេទៅទៀត។

កាមេរ៉ាថ្មីនេះ មាន2ប្រភេទ គឺ ប្រភេទ 50MP និង 100MP។ H6D បានបំពាក់នូវ ៖

sensor CMOS ថ្មី , processor ថ្មី
ថតក្នុង Raw mode: 3FR និង JPEG mode
ISO បានដល់ 12800
ចំពោះ 100MP dynamic range 15, 50MP dynamic range 14
មាន USB-3 នៅក្នុងនោះស្រាប់ អ្នកអាចភ្ជាប់វាជាមួយនឹង កុំព្យូទ័រ មិនថា Mac ឬ PC និងដោយមិនចាំបាច់ដោះយក memory card ចេញ
មានអេក្រង់ Touchscreen នៅពីក្រោយ ស្រួលក្នុងការរៀបចំប្លង់ថត
មាន Wifi សំរាប់ភ្ជាប់ជាមួយ Tablet ដោយប្រើកម្មវិធី Phocus mobile វាអាចមើលបានដោយស្រួល ដូចអេក្រង់នៅពីក្រោយកាមេរ៉ា ដូចនេះ ពេលណាអ្នកនៅម្នាក់ឯង អ្នកក៏អាចថតបានដោយមិនចាំបាច់ អ្នកជួយ
មានរន្ធ memory card 2 គឺ Cfast card និង sd card
អាចថតវីដេអូបាន 4k

កាមេរ៉ា ប្រភេទ Medium format នេះភាគច្រើនគេបានប្រើវាសំរាប់ថតយកនូវរូបភាពមួយដែលច្បាស់ខ្លាំង អាច Print ជារូបមួយ ទំហំធំ ហើយមើលទៅមិនបែក។ គេប្រើវាក្នុងការថតស្ពតពាណិជ្ជកម្ម ធំៗ ផ្ទាំងប៉ាណូផ្សេងៗ។ ដូចនេះ កាមេរ៉ា នេះមានតំលៃថ្លៃជាខ្លាំង សំរាប់កាមេរ៉ា H6D មានតំលៃប្រហែល 20000$ ជាង។ ខាងក្រោមនេះជារូបភាពដែលទទួលបានពីកាមេរ៉ាមួយនេះ និង វីដេអូ ពាណិជ្ជកម្ម របស់វា។

អានបន្ត

Like 1626

ឋានសួគ៌តាតៃ

ដំណើរកំសាន្ត, សង្គម

01/04/2016

បើអស់លោកអ្នកមានពេលច្រើនគួរសម្យក្នុងរយះពេល បីឬបួនថ្ងៃនោះ អស់លោកអ្នកគួរតែរកកន្លែងណាមួយដើម្បីកំសាន្តជាលក្ខណៈបែបធម្មជាតិ និងមានដៃទន្លេសមុទ្របួនមុខពោពេញទៅដោយជីវិតបែបធម្មជាតិ និងរុក្ខជាតិ។ តាតៃគឺជាតំបន់រម្មណីដ្ឋានមួយដ៏ស្រស់ត្រកាលសម្រាប់ភ្ញៀវជាតិ និង អន្តរជាតិ។ តាតៃមានទីតាំងនៅក្នុងខេត្តកោះកុងនៃភាគនារតីនៃប្រទេសកម្ពុជា បើគិតពីភ្នំពេញមកតាតៃមានចំងាយប្រហែល 260 km ចំណែកឯចំងាយពីក្រុងខេមរៈភូមិន្ទមកឃុំតាតៃមានចំងាយ 20km ។ តាតៃស្ថិតនៅក្នុងឃុំតាតៃ នៅជាប់ផ្លូវជាតិលេខ 48 ដែលមានស្ពានដ៏ស្រស់ស្អាតឈ្មោះថាស្ពានតាតៃ ដោយមានប្រជាជននៅទីនោះប្រកបមុខរបរជាអ្នកនេសាទ និងអ្នកប្រមាញ់ជាដើម។

តាតៃជាកន្លែងរម្មណីដ្ឋានដែលមាន ដៃសមុទ្របួនជួបគ្នាហើយជាកន្លែងដែលមានជីវៈចំរុះ គ្រប់ប្រភេទសត្វសមុទ្រ និងនៅតាមបណ្តោយច្រាំងដៃសមុទ្រគឺពោពេញទៅដោយរុក្ខជាតិតូចធំគ្រប់ប្រភេទជាពិសេស ដើមកោងកាងតែម្តង។ ដោយតំបន់នេះមានសក្តានុពលច្រើន ហើយក៏ជាកន្លែងដែលយើងគួរតែយកចិត្តទុកដាក់ខាងវិស័យទេសចរណ៍ រាជរដ្ឋាភិបាលយើងបានអនុញ្ញាត្តិអោយវិស័យឯកជន បរទេសមួយចំនួនទៅវិនិយោគនៅទីនោះ ដូចជារម្មណីដ្ឋាន, សណ្ឋាគារ, កន្លែងកំសាន្តបែបធម្មជាតិ ទឹកធ្លាក់ និងមានតំបន់វារីអគ្គីសនីផងដែល ហើយក៏ជាតំបន់ដែលមានឧស្សាហកម្ម និងទេសចរណ៍សម្រាប់បង្កើតការងារអោយប្រជាពលរដ្ឋទៀតផង។

ដូចតែអ្នករាល់គ្នាបានឃើញនៅក្នុងរូបថតនេះ ចំពោះការស្នាក់នៅនៅក្នុងតំបន់តាតៃ ដែលភាគច្រើន ច្រើនមានតែបឹងកាឡូ និងកញ្ចុះដាច់ៗពីគ្នា សម្រាប់ការស្នាក់នៅក្នុង 1 យប់ មានតំលៃចាប់ពី $80-$100 នេះជាតម្លៃទាបបំផុត។ ដោយមានការផ្តល់សេវាគ្រប់គ្រាន់ដូចជា ប្រព័ន្ធទឹកស្អាត និង ប្រព័ន្ធភ្លើង មានម៉ាស៊ីនត្រជាក់ ហើយយើងអាចហែលទឹកសមុទ្រដោយខាងសណ្ឋាគារមានការរៀបចំប្រព័ន្ធការពារ ដោយដាក់សំណាញ់ព័ន្ធជុំវិញបឹងកាឡូរបស់គេប្រហែល 1km ដែលវាមានភាពងាយស្រួលក្នុងការហែលទឹកកំសាន្តលេង ព្រមជាមួយនិងការជិះទូកកាយ៉ាកផងដែល។ ចំពោះម្ហូបអាហារសំបូរទៅដោយ ម្ហូបសមុទ្រគ្រប់ប្រភេទ ម្ហូបបែបខ្មែរ និងម្ហូបបែបបរទេសផង ដែរហើយមានតម្លៃសមរម្យទៀតផង។

នៅទីនោះមានទឹកជ្រោះតាតៃដែលជាទឹកជ្រោះដ៏ស្រស់ស្អាតនៅក្នុងខេត្តកោះកុងផងដែរ ទឹកជ្រោះនេះមាន២ជាន់ធំៗ ចំពោះជាន់ទីមួយមានកម្ពស់ ចាប់ពី 5m ទៅ 6m ចំណែកជាន់ទីពីមានកម្ពស់ ចាប់ពី12m ទៅ 15m ។ នៅក្នុងរដូវវស្សាចំពោះពេលមានភ្លៀងធ្លាក់ច្រើន ទឹកជ្រោះគឺពិបាកអោយយើងទៅកំសាន្តខ្លាំងណាស់ព្រោះទឹកហូរខ្លាំង ដែលធ្វើអោយយើងមានគ្រោះថ្នាក់ច្រើន ហើយតំបន់ទឹកជ្រោះតាតៃគឺសំបូរដោយសត្វព្រៃគ្រប់ប្រភេទដែលយើងគួរតែប្រុងប្រយ័ត្នផងដែរ។

OLYMPUS DIGITAL CAMERA

ចំពោះការជិះទូកមើលទេសភាពជុំវិញដៃព្រែកតាតៃពិតជាមិនគួររំលងឡើយ ព្រោះថាមានរុក្ខជាតិ ព្រៃកោងកាងជាង 16 ជីវៈចំរុះខុសៗគ្នា នៅតាមបណ្តោយដៃព្រែកតាតៃនេះឯង។ តាតៃគឺពិតជារម្មណីដ្ឋានធម្មជាតិនៃឋានសួគ៌ាយ៉ាងពិតប្រាកដ ចំពោះរូបខ្ញុំបានទៅលេងបានម្តងដែរ ដែលធ្វើអោយរូបខ្ញុំមិនអាចបំភ្លេចបានឡើយ។ ប្រសិនបើអស់លោកអ្នកចូលចិត្តជីវិត និងការរស់នៅម្តងម្កាលសម្រាប់ជីវិតបែបធម្មជាតិ តាតៃគឺជាជម្រើសដ៏ល្អសម្រាប់អស់លោកអ្នក ហើយវាមានតម្លៃសមរម្យផងដែរ។

អានបន្ត

Like 1366

កាមេរ៉ា CANON 80D ថ្មី

បច្ចេកវិទ្យា

19/02/2016

កាលពីម្សិលមិញ ក្រុមហ៊ុន Canon បានបញ្ចេញនូវ កាមេរ៉ាសេរីថ្មី មួយដែលជាជំនាន់ក្រោយរបស់ Canon 70D គឺ Canon 80D។ កាមេរ៉ានៅក្នុងប្រភេទនេះជាកាមេរ៉ា DSLR អាចផ្តូរ Lens បាន មានសមត្ថភាពគ្រប់គ្រាន់សំរាប់អ្នកដែលចង់បានរូបភាពដែលអ្នកអាចគ្រប់គ្រងបាន។ Canon line-up (60D, 70D, 80D) គេបានអោយចំណាត់ថ្នាក់វានៅកណ្តាល មិនអន់ពេក ហើយក៏មិនល្អពេកដែល ជាពិសេសវាផលិតឡើងសំរាប់អ្នកដែលចង់យកទៅប្រើប្រាស់ធម្មតា ឬ មុខជំនួញតូច ឬ មធ្យមដែលគេហៅវា Mid range Crop Sensor DSLR។

នៅក្នុងកាមេរ៉ាថ្មី Canon 80D នេះ មានលក្ខណៈពិសេសជាច្រើនដែល Canon បានដាក់បញ្ចូល ដែលនឹងមានរៀបរាប់នៅខាងក្រោម ៖

សំរាប់ Image Sensor គឺ Sensor CMOS ដែលមានចំនួន 24MP ភ្ជាប់មកជាមួយនឹង ការសំអាត Sensor ដោយខ្លួនឯង ឬ សំអាតពីក្រៅក៏បាន។
Auto focus: មានចំនួន 45 ចំនុច ( All Cross-type = 45 ដែលលឿនជាង 17 Cross-type របស់ Canon 70D ) ម្យ៉ាងវិញទៀត ចំនុច Autofocus របស់វាឃ្លាតៗពីគ្នា លាតសន្ធឹងរហូតដល់កៀនៗនៃរូបភាព ដូចនេះ អ្នកថតរូបអាចFocus subject ដែលនៅកៀនគេបំផុតបានដោយគ្មានបញ្ហា។ ចំនែកឯ ការ Auto focus នៅទីងងឹត គឺអាចថតបានលើ -3EV ឡើងទៅ។
វាប្រើប្រាស់ប្រព័ន្ធ Dual pixel CMOS AF សំរាប់ការថត វីដេអូ និង ការថតរូប នៅពេលអ្នកប្រើ live view។ វាផ្តល់នូវការ focusដោយ auto និងមានលក្ខណៈ ច្បាស់ល្អ វា focus តាម Subject អ្នកដោយគ្មានការទាក់ឡើយ ហើយលឿន។
ISO 100-16000 (អាចតំឡើងបាន 25600)
អាចថតបាន 7fps
ទំហំអេក្រង់ខាងក្រោយទំហំ 3inch ដែលអាចបត់បែនបាន និងអាចបង្ហាញនូវរូបភាពច្បាស់ល្អ Touch screen
អាចថតវីដេអូបានជា MOV និង MP4
- MOV:
  1920 x 1080 (Full HD): 30 fps / 24 fps
- MP4:
  1920 x 1080 (Full HD): 60 fps / 30 fps / 24 fps
  1280 x 720 (HD): 60 fps/ 30 fpស
ល្បឿននៃការថត 1/8000 – 30វិនាទី
ភ្ជាប់ជាមួយ effect ជាច្រើននៅក្នុង កាមេរ៉ាជាស្រេច ដោយមិនបាច់ចូលទៅកែក្នុង កុំព្យូទ័រ ឬ ទូរស័ព្ទ
មាន internal wifi សំរាប់ការបញ្ជា ឬ បញ្ជូនរូបភាពទៅលើទូរស័ព្ទផ្សេងៗ។

ពត៌មានទាំងអស់នេះ គឺបានមកពី ក្រុមហ៊ុន Canon ផ្ទាល់ ចំណែកឯការថតរូបផ្ទាល់ក៏ពួកយើងមិនទាន់ដឹងច្បាស់នៅឡើយទេថាវាមានអ្វីដែលខូចខាត ឬ ខុសឆ្គង។ ចំនែកឯការលក់ Canon នឹងចាប់លក់នៅខែ មីនា ឆ្នាំ2016 នេះក្នុងតំលៃប្រហែល 1200$ ហើយវានឹងមាននៅខ្មែរក្នុងពេលឆាប់ៗនេះ។

អានបន្ត

Like 1034

a6300 របស់ Sony

បច្ចេកវិទ្យា

06/02/2016

ក្រុមហ៊ុនSony ដែលល្បីខាងបច្ចេកវិទ្យា អេឡិចត្រូនិច ដែលមានមនុស្សរាប់លានអ្នកបានទទួលស្គាល់ ឥឡូវនេះគេបានបញ្ចេញនូវ កាមេរ៉ាតូច ប្រភេទ Mirror-less ដែលកំពុងតែល្បីល្បាញ មួយប្រភេទសំរាប់អ្នកដែលប្រើកាមេរ៉ាប្រភេទ Crop។ អ្វីទៅជា Mirror-less កាមេរ៉ា? គឺជាកាមេរ៉ាដែល មិនមានកញ្ចក់ខាងមុខ Sensor របស់វា ដូចនេះគេអាចធ្វើវាអោយតូច និង ស្តើងបាន ស្រាល ស្រួលកាន់ ជាពិសេសមនុស្សស្រី ការប្រើកាមេរ៉ានេះសមស្របនឹងទំរង់ដៃដ៏តូចរបស់គាត់ ម្យ៉ាងទៀត កាមេរ៉ា Mirror-less ជាកាមេរ៉ាដែលមានសមត្ធភាពដូច កាមេរ៉ាប្រភេទ DSLR អាចផ្លាស់ប្តូរ Lens បានដូចគ្នា និង អាចសារ៉េបានគ្រប់អ្វីៗដែលអ្នកត្រូវការថត។

SONY a6300

កាមេរ៉ា a6300 ជាកាមេរ៉ាជំនាន់ថ្មីរបស់ a6000 ដែលជាពពួក APS-C និង ផ្លាស់ប្តូរ Lens បាន។ Sony បានបញ្ជាក់ថា កាមេរ៉ាថ្មីនេះមានលក្ខណៈជឿនលឿនជាងកាមេរ៉ាចាស់ច្រើនណាស់ជាពិសេស Auto focus និង ការចាប់យករូបភាពបានល្អ។ ខាងក្រោមនេះគឺជាអ្វីពិសេសៗដែលមាននៅក្នុងកាមេរ៉ា Sony a6300៖

4D auto focus និងមាន 425 ចំនុច auto focus
24MP
11fps នៅពេលអ្នកប្រើភ្នែកមើលក្នុង Viewfinder (ជិតស្មើ D5 និង 1Dx mark II)
8fps នៅពេលអ្នកប្រើLCD (live view)
ISO ធំបំផុត គឺ 51200
អាចថតវីដេអូបាន 4K
ប្រើ Lens E mount
អ្វីដែលប្រសើរ គឺ តំលៃក្រោម 1000$

អ្វីទៅជា 4D autofocus?

ការប្រើបច្ចេកវិទ្យា autofocus នៅនឹងមួយកន្លែង រួមផ្សំជាមួយ លឿន គឺជាបច្ចេកវិទ្យា 3D ប៉ុន្តែ Sony បានបន្ថែមនូវ បច្ចេកវិទ្យាថ្មីគឺ វាអាចទស្សទាយ នូវចលនារបស់ Subject ដូចនេះ អ្វីដែលចេញមកគឺជារូបភាពច្រើនសន្លឹកប៉ុន្តែ Subject នៅតែមិនខុសfocus នេះហើយគឺ 4D autofocus។

ដូចនេះការដែលប្រើ 4D autofocus រួមផ្សំជាមួយ ចំនុច focus ដល់ទៅ 425 ការថតរបស់វាមានល្បឿនអាចស្មើនឹង កាមេរ៉ា Professional មួយ។ ការ focus មិនគិតថាSubject អ្នកនៅកន្លែងណានោះទេ តែងតែត្រូវ Focus ជាប់ជានិច្ច។

ហើយម្យ៉ាងទៀត ការថតវីដេអូ វាប្រើ ទំហំ 20MP នៃ Sensor ដើម្បីថតអោយបាននូវវីដេអូមួយដែល ល្អបំផុត គឺ វាប្រើគ្រប់ pixel នៅលើSensor សំរាប់ថត ដូចនេះអ្នកអាចឃើញនូវ ភាពច្បាស់ គ្មានចំនុចក្រហម នៃវីដេអូមួយ។

ជាចុងក្រោយ កាមេរ៉ាថ្មីមួយគ្រឿងនេះគឺ តូចស្រួលសំរាប់អ្នកដែលចូលចិត្ត របៀបធ្វើដំនើរស្រាលៗ ដូចជាស្ត្រីជាដើម។ គេបានអោយនាមវាថា ជាកាមេរ៉ាដែល Autofocusលឿនជាងគេនៅលើលោក។ ចាំមើលតើ Nikon និង Canon មានអ្វីមកប្រៀបជាមួយ Sony បានទៀតសូមរង់ចាំ :D.

អានបន្ត

Like 1585

សំភារៈដែលអ្នកមានកាមេរ៉ា DSLR គួរតែមាន

បច្ចេកវិទ្យា

09/12/2015

ដូចដែលអ្នកបានឃើញសព្វថ្ងៃ អ្នកដែលប្រើប្រាស់កាមេរ៉ា មានការកើនឡើងជាខ្លាំង ដោយសារតែអ្នកខ្លះចូលចិត្តខាងការថតរូប អ្នកខ្លះចូលចិត្តខ្លួនឯង និង អ្នកខ្លះទៀតគិតថាមានកាមេរ៉ានេះគឺឡូយ។ ប៉ុន្តែ មិនថាអ្នកមានហេតុផលអ្វីក៏ដោយ អ្នកគួរតែមានសំភារៈទាំងនេះ ដើម្បីសំផ្គុំជាមួយ កាមេរ៉ារបស់អ្នក ហើយផ្តិតយករូបថតដែលមានលក្ខណៈស្អាតដូចអ្នកជំនាញ។ សំភារៈមានដូចខាងក្រោមនេះ ៖

ជើងកាមេរ៉ា (Tripod)

ការប្រើដៃដែលមានលំនឹងល្អ ក៏អ្នកអាចទទួលបានរូបភាពមួយដល់ច្បាស់បានដែល ប៉ុន្តែហេតុអ្វីបានជាអ្នកត្រូវការ ជើងកាមេរ៉ាថែមទៀត? គឺព្រោះតែហេតុផលផ្សេងៗដូចជា៖

នៅពេលអ្នកថតរូបនៅពេលយប់ អ្នកត្រូវប្រើពេលយូរដើម្បីចាប់នូវរូបភាពបានច្បាស់ល្អ ចុះបើដៃអ្នករង្គើ? ដូចនេះ ជើងកាមេរ៉ា ជួយកាមេរ៉ាអ្នកអោយនៅនឹង ដូចនេះទោះជាអ្នកប្រើពេលចាប់រូបភាពយូរប៉ុណ្ណា ក៏រូបភាពនៅតែមានសភាពច្បាស់ល្អដែល
បើសិនជាអ្នកមាន Flash light អ្នកមិនចាំបាច់ទិញជើង Flash មួយទៀតក៏បាន។ អ្នកអាចបំពាក់ flash នៅលើជើងកាមេរ៉ាផ្ទាល់តែម្តង ប៉ុន្តែអ្នកត្រូវកាន់ កាមេរ៉ាដោយដៃផ្ទាល់។
នៅពេលដែលអ្នកប្រើកាមេរ៉ាធ្ងន់ ឬ Lens ធ្ងន់ ហើយ ឈរចាំថត អ្វីមួយដូចជា ថត sport ជើងកាមេរ៉ាអាចសំរួលកំលាំងអ្នកបានខ្លះ ហើយវាអាចជួយជាលំនឹង នៅពេលថតរូបភាពទៀតផង។
អ្នកដែលនឹកឃើញយក DSLR ថតវីដេអូឬទេ? ដូចនេះ ជើងកាមេរ៉ា ក៏អាចជួយអ្នក អោយវិដេអូនៅនឹងល្អ និង អាចធ្វើជាចលនាដែលមានសភាព smooth ចុះក្រោម ឡើងលើ បានដែរ។

Lens hood

Lens hood គឺជាសំភារៈមួយសំរាប់ ជួយកំចាត់ការចាំងពន្លឺផ្សេងៗ។ គ្រប់lensគឺវាមានlens hood ផ្សេងៗគ្នា ដូចនេះអ្នកគួរតែរកនូវhood ណាដែលត្រូវជាមួយ lens របស់អ្នក ជាពិសេសអ្នកដែលទិញ Lens មួយទឹក។ ម៉្យាងទៀត វាជួយការពារ កញ្ចក់ខាងមុខរបស់អ្នកកុំអោយប៉ះនឹង ផ្ទៃផ្សេងៗ ដូចនេះអ្នកមិនចាំបាច់ ប្រើ lens capនៅពេលដែលអ្នកប្រញាប់ ឬ ថតភ្លាមៗ គ្រាន់តែបំពាក់ lens hood ជាការស្រេច អ្នកអាចដកកាមេរ៉ាមកភ្លាម ថតភ្លាម។

សំភារៈសំអាត កាមេរ៉ា និង កញ្ចក់

សំភារៈអ្នកទិញមករាប់ពាន់ដុល្លា តើអ្នកហ៊ានប្រថុយមិនសំអាតវា ទុកអោយវានៅប្រលាក់ដីទេ ប្រាកដជាអត់ហើយ ដូច្នេះអ្នក គួរតែទិញសំភារៈសំអាតមួយឈុត ទុកប្រើទៅ។ ការប្រើប្រាស់ សំភារៈខ្លះប្រើតែ ១ទៅ២ដងបានហើយ ដូចជា ក្រណាត់ជូត កញ្ចក់ lens ជូតលើកទីមួយ មានជាប់ដីនៅលើក្រណាត់ ជូតលើកទី២ ប្រាកដជាជាប់ខ្លាំងជាងមុន ចុះបើជូតយូរៗទៅវាឆ្កូតកញ្ចក់ lens។ សំភារៈខ្លះទៀតអ្នកអាចប្រើតែម្តង ដូចជា ប្រដាប់ជូតSensor និង ខ្លះទៀតអ្នកអាចប្រើរហូត។

តេលេ (remote shuter)

លទ្ធភាពរបស់វា មានដូចជា៖

នៅពេលយប់ នៅពេលអ្នកបើកពេលថតច្រើន អ្នកមិនគួរប្រើដៃទៅចុចលើកាមេរ៉ាផ្ទាល់ទេ វាអាចរង្គើដល់រូបភាពអ្នក អ្នកគួរតែមានតេលេនេះមួយសំរាប់បញ្ជា
នៅពេលដែលអ្នកចង់ថតរូបដែលមានរូបខ្លួនឯងជាមួយនឹង ក្រុមគ្រួសារ ឬ មិត្តភ័ក្ត
នៅពេលដែលអ្នកចង់បើកពេលថត អោយបានលើស 30វិនាទី ព្រោះការថតរូបខ្លះត្រូវចំនាយ រយៈពេល 4 ទៅ 5 នាទី។

ភ្លើងបំភ្លឺបំពាក់ខាងក្រៅ (external flash)

ពន្លឺជាអ្វីដែលសំខាន់នៅក្នុង ការថតរូប បើគ្មានពន្លឺការថតរូបអាចទៅរួច គឺថតបានរូបភាពខ្មៅសុទ្ធ ដូច្នេះដើម្បីអោយបាន រូបភាពដែលមានពណ៌ ចេញជារូបផ្សេងៗ កាមេរ៉ាត្រូវការ ពន្លឺ ចុះបើសិនជាគ្មាន ឬក៏ ពន្លឺតិច? ការមាន flash 1 ក៏មិនជាបញ្ហាអ្វីដែល សំខាន់ Flash ឥឡូវថោកទៀត។ អ្នកអាចប្រើប្រាស់ Flash នៅពេលយប់ ឬ ប្រើ Flash ដើម្បីបំពេញកន្លែងដែល ងងឹត ការប្រើ Flash គេមានរបៀបច្រើនសំរាប់ប្រើ ដូចនេះអ្នកគួរតែមានមួយ ស្រួលនៅពេលដែលអ្នកជួបបញ្ហា។

ទាំងអស់ខាងលើនេះគ្រាន់តែជា សំភារៈ 5 យ៉ាងដែលអ្នកងាយស្រួលរក នឹង វាអាចសំរួលដល់អ្នកនៅពេលអ្នកជួបបញ្ហាលំបាកនាៗ ហើយក៏វាមានតំលៃថោកៗដែរ។ វាអាចអោយគេមើលមកថាអ្នកក៏ចេះប្រើ កាមេរ៉ា DSLR ចេះថែរក្សារបស់ អ្វីដែលសំខាន់គឺអ្នកអាចក្លាយជា អ្នកជំនាញម្នាក់ ដោយរួមផ្សំ គ្រឿងកាមេរ៉ា និង គំនិតបង្កើតថ្មី របស់អ្នក។

អានបន្ត

Like 1646

Lens សំរាប់អ្នកទើបតែរៀនប្រើកាមេរ៉ា dSLR Nikon តម្លៃក្រោម 300$

បច្ចេកវិទ្យា

16/11/2015

អ្នកបានអានពីមុនហើយចំពោះ ការជ្រើសរើស កាមេរ៉ាសំរាប់អ្នកទើបតែរៀនដំបូង និង ពួកយើងបានបង្ហាញចំពោះការជ្រើសរើសយក កញ្ចក់ (Lens) សំរាប់ Canon រួចមកហើយ ដូចនេះលើកនេះយើងខ្ញុំនឹងបង្ហាញពី កញ្ចក់ របស់ Nikon ម្តង។ កញ្ចក់ទាំអស់នេះថោកៗមែនប៉ុន្តែនៅក្នុងដៃអ្នកចេះប្រើ វាអាចថតបានរូបភាពល្អៗនិងផ្លែកៗជាច្រើន។

AF-S DX NIKKOR 18-55mm f/3.5-5.6G VR II

តម្លៃនៅទីផ្សាប្រទេសកម្ពុជា $100 (យោងតាមហាងលក់កាមេរ៉ា Camera Hub)

វាគឺជាកញ្ចក់ ដែលអ្នកអាចភ្ជាប់មកជាមួយពេលដែលទិញកាមេរ៉ាប្រភេទ DX (ថោកៗ) ដែលផ្តោតសម្រាប់អ្នកចាប់ផ្តើមដំបូងរបស់ Nikon។ កញ្ចក់នេះភ្ជាប់មកជាមួយនូវ auto-focus ស្រាប់ ដូចនេះចំពោះកាមេរ៉ាដែលគ្មាន ម៉ូទ័រ focus នោលើកាមេរ៉ា គាត់ក៏អាចប្រើ auto-focus នៅក្នុង កញ្ចក់ដែរ។ អ្នកត្រូវដឹងថាចំពោះ Nikon កាមេរ៉ារបស់វាខ្លះមានម៉ូទ័រ Focus មកជាមួយ ដូចនេះវាអាចប្រើជាមួយ កញ្ចក់ ចាស់ៗរបស់ Nikon ដូចជាកញ្ចក់ស៊េរី D និងកាមេរ៉ាខ្លះទៀតគឺគ្មាន ម៉ូទ័រ focus មកទេ ដូចនេះវាអាចប្រើជាមួយកញ្ចក់ចាស់ៗបានដែរ គ្រាន់តែមិនមាន Autofocus ដូចនេះយើងត្រូវ focus ដោយដៃផ្ទាល់ (manual focus)។ ចំពោះកញ្ចក់មួយនេះ គឺវាប្រើបានតែលើកាមេរ៉ា DX របស់ Nikon ប៉ុណ្ណោះ អ្នកអាចបំពាក់កញ្ចក់នេះលើកាមេរ៉ា FX មែនប៉ុន្តែរូបភាពទំហំពេញ FX របស់អ្នកនឹងមានរង្វង់ងងឹតនៅផ្នែកគៀនៗ។ ចំពោះ18-55mm នៅលើ DX គឺប្រហែល 27-83mm សំរាប់ 27mm គឺវាលាតសន្ធឹងល្មមនឹងថតរូបទេសភាពបានហើយ ហើយ 83mm គឺល្មមសំរាប់ថត portrait បាន។ គ្រាន់តែ Aperture ទំហំ f/3.5-5.6 វាមិនសូវធំ ដូចនេះវាមិនសូវអាចថតពេលងងឹតបានទេ។ កញ្ចក់នេះមានមុខងារកាត់បន្ថយភាពរង្គើក្នុងរូបភាពដែលបណ្ដាលមកពីការញ័រដៃ VR (Vibration Reduction)។ កញ្ចក់នេះគឺ សំរាប់អ្នកទើបតែរៀនដំបូងឬអ្នកប្រើធម្មតាដែលមិនសូវត្រូវការ Zoom ចូលខ្លាំងពេក វាមិនសូវផ្តល់ជាមានអ្វីអស្ចារ្យទេ ប៉ុន្តែបើអ្នកយល់អំពីវា អ្នកអាចថតរូបភាពជាមួយកញ្ចក់នេះមកបានល្អ និង ច្បាស់ៗទៀតផង។

AF-S DX NIKKOR 35mm f/1.8G

តម្លៃនៅទីផ្សាប្រទេសកម្ពុជា $242 (យោងតាមហាងលក់កាមេរ៉ា Camera Hub)

ដូច Canon 50mm f1.8 ដែរ វាជា Prime Lens (កញ្ចក់ដែលមានប្រវែងប្រសព្វ Focal Length ដែលមិនអាចផ្លាស់ផ្តូរបាន)។ 35mm នោះលើ DX គឺប្រហែល 53mm ល្មមសំរាប់ថតរូបមនុស្សពាក់កណ្តាលខ្លួន សំរាប់ការដើរថតរូបតាមផ្លូវ (Street photography) ។ កញ្ចក់នេះមានទំហំតូច បើប្រើសំរាប់ Street photography គឺកាន់តែល្អទៀតព្រោះយើងមិនចង់បានការចាប់អារម្មណ៍មកលើយើងទេ។ ចំពោះការថតវាអាចធ្វើអោយផ្ទៃខាងក្រោយលែងច្បាស់ (blur) ដូចនេះវាអាចធ្វើអោយអ្វីដែលយើងថតរឹតតែលេចចេញពីផ្ទៃក្រោយ (background) យ៉ាងខ្លាំង។ បន្ថែមពីលើនេះទៅទៀត ចំពោះ Aperture ទំហំ f/1.8 វាអាចជួយអ្នកទាញយកពន្លឺខ្លះ នៅពេលងងឹត។ បើសិនជាចង់ទិញអ្នកត្រូវសួររក 35mm f/1.8G សម្រាប់ DX ឲ្យប្រាកដ ព្រោះកញ្ចក់ 35mm f/1.8G ដូចគ្នាក៏មានសម្រាប់ FX ដែលជាម៉ូដែលមួយទៀតដែលមានតម្លៃថ្លៃជាងនេះ។

AF-S NIKKOR 50mm f/1.8G

តម្លៃនៅទីផ្សាប្រទេសកម្ពុជា $252 (យោងតាមហាងលក់កាមេរ៉ា Camera Hub)

ប្រហាក់ប្រហែលនឹង AF-S NIKKOR 35mm f1.8G ដែល ប៉ុន្តែវាមើលទៅឃើញជិតជាងឬអាចថាវា zoom ចូលជាងបើប្រៀបធៀបនឹងកញ្ចក់ 35mm។ គុណភាពរូបភាពវាច្បាស់ជាង AF-S NIKKOR 35mm f1.8G បន្តិច។ និងដោយសារតែកញ្ចក់ទាំងពីមានទំហំ Aperture f/1.8 ដូចគ្នា ប្រវែងប្រសព្វ (focal length) 50mm f/1.8G នេះអាច blur រូបភាពបានច្រើនជាង ដូចនេះសម្រាប់អ្នកដែលចូលចិត្តយកវាទៅថត រូបភាពមនុស្ស និង ផលិតផលនាៗ។ មិនថា canon ឬ nikon 50mm f1.8 គឺជាជំរើសល្អសំរាប់អ្នកចង់រៀនថតរូបមនុស្ស(ម៉ូដែល) ហើយវាថោកទៀតផង។ សំរាប់អ្នកដែលចង់បាន Aperture រឹតតែធំ អ្នកអាចយក 50mm f1.4D ដែលមានតម្លៃប្រហាក់ប្រហែលគ្នា ប៉ុន្តែជាមួយកញ្ចក់ចាស់ប្រភេទ D របស់ Nikon តែអ្នកត្រូវប្រាកដថា កាមេរ៉ាអ្នកមានម៉ូទ័រ focus ពុំនោះទេអ្នកមិនអាចប្រើប្រាស់ប្រព័ន្ធ Autofocus កើតទេ។

AF-S DX NIKKOR 55-200mm f/4-5.6G ED VR II

តម្លៃនៅទីផ្សាប្រទេសកម្ពុជា $199 (យោងតាមហាងលក់កាមេរ៉ា Camera Hub)

កញ្ចក់នេះ ហ្សូម (zoom) បានឆ្ងាយ ហើយទទួលបានរូបភាពច្បាស់ទោះជាដៃរបស់អ្នករង្គើក៏ដោយ ព្រោះវាមានមុខងារកាត់បន្ថយភាពរង្គើក្នុងរូបភាពដែលបណ្ដាលមកពីការញ័រដៃ (VR) ដែលយើងបាននិយាយខាងលើ។ វាមាន កញ្ចក់មួយដែលអាចកាត់ពណ៌ដែលមិនល្អចេញពីរូបភាពអ្នក ហើយ សំរាប់ ការថតវិញ ភាគច្រើនគេប្រើកញ្ចក់នេះសម្រាប់ថតរូប កីឡា, Concert អ្វីដែលឆ្ងាយហើយយើងមិនអាចចូលជិតបាន។ ខាងក្រោមនេះយើងដាក់តែរូបភាព AF-S DX NIKKOR 55-200mm f/4-5.6G IF-ED VR I ទេ។

កញ្ចក់ 3 ក្នុងចំណោបកញ្ចក់ទាំង 4 ខាងលើអាចដាក់បានតែនៅលើ កាមេរ៉ា Nikon DX ប៉ុណ្ណោះ មានតែកញ្ចក់មួយទេដែលអាចប្រើលើ FX បាន វាគឺ AF-S NIKKOR 50mm f/1.8G។ កញ្ចក់ទាំងនេះមានតំលៃថោកអាចអោយអ្នកទាញយកនូវរូបភាពល្អៗពីពួកវាបានដូចដែលអ្នកបានឃើញនៅក្នុងរូបដែលគេបានថតមកហើយ។ ត្រូវចំណាំថាទោះជាវាមានតម្លៃថោកពេលខ្លះ ក៏វាមានសមត្ថភាពអាចថតបានល្អជាងកញ្ចក់ដែលថ្លៃដែរ។ ការថតរូបមិនមែនគិតតែទៅលើគ្រឿងថតរូបប៉ុណ្ណោះទេ សំខាន់ជាងនោះទៅទៀតនោះគឺស្នាដៃរបស់អ្នកថតរូបផ្ទាល់។

អានបន្ត

Like 5483

កាមេរ៉ាដែលអ្នកអាចទិញបានក្រោមតម្លៃ $300

បច្ចេកវិទ្យា

11/11/2015

ទីផ្សាកាមេរ៉ាធំណាស់ ហើយវាសម្បូរទៅដោយក្រុមហ៊ុនផលិតកាមេរ៉ាជាច្រើន ដែលក្នុងមួយឆ្នាំៗក្រុមហ៊ុនទាំងនោះមានបញ្ចេញផលិតផលកាមេរ៉ាយ៉ាងច្រើនម៉ូដែលចូលក្នុងទីផ្សា។ កាមេរ៉ានីមួយៗត្រូវបានផលិតសំដៅទៅអ្នកប្រើប្រាស់ខុសៗគ្នា កត្តានេះរួមជាមួយចំនួនម៉ូដែលយ៉ាងច្រើននៅក្នុងហាងកាមេរ៉ាទៀតនោះវាអាចធ្វើឲ្យអ្នករកទិញកាមេរ៉ាវិលមុខ យ៉ាងខ្លាំងទៅលើជម្រើសរបស់ពួកគាត់ដែលគាត់ត្រៀមនឹងយកថវិកាដែលគាត់បានសន្សំទៅចំណាយលើឧបករណ៍ថតរូបទាំងនោះ។ ហើយក៏មានអ្នកខ្លះដោយមិនបានវិភាគច្បាស់លាស់នៅពេលទិញ បានស្តាយក្រោយនឹងជម្រើសរបស់ពួកគាត់ព្រោះកាមេរ៉ាដែលគាត់ទិញមិនត្រូវនឹងមុខងារដែលពួកគាត់ត្រូវការដើម្បីប្រើប្រាស់។ ដើម្បីជួយក្នុងការជ្រើសរើសរបស់អ្នក ខ្ញុំបានរៀបចំជម្រើសកាមេរ៉ាល្អៗខ្លះនៅក្នុងទីផ្សាយើងមកវិភាគនិងឲ្យជាយបល់ដល់អ្នក ដោយសង្ឃឹមថាវាអាចជួយក្នុងការសម្រេចចិត្ត របស់អ្នក។ កាមេរ៉ាដែលខ្ញុំជ្រើសរើសនេះមានមុខងារខុសៗគ្នា និងសំដៅទៅលើទីផ្សាអ្នកប្រើប្រាស់ខុសៗគ្នា។ ប៉ុន្តែវាសុទ្ធតែមានតម្លៃថោកនិងផ្តល់មុខងារល្អៗច្រើនដែលគួរឲ្យចាប់អារម្មណ៍ សម្រាប់ចំនួនថវិកាដែលអ្នកត្រៀមនឹងចំណាយ។

Canon EOS 1200D

តម្លៃនៅទីផ្សាប្រទេសកម្ពុជា $299 ភ្ជាប់ជាមួយ Kit lens Canon EF-S 18-55mm ƒ/3.5-5.6 IS STM (យោងតាមហាងលក់កាមេរ៉ា Camera Hub)

អ្នកអាចនឹងចង់បានកាមេរ៉ាដែលអាចផ្លាស់ប្តូរកញ្ចក់បាន (dSLR) ដោយអ្នកធ្លាប់ឃើញមិត្តភក្តិរបស់អ្នកប្រើកាមេរ៉ាប្រភេទនេះ ហើយមើលទៅវាមានលក្ខណៈជំនាញនិងឡូយ រួមជាមួយគុណភាពរូបភាពច្បាស់ល្អនិងអាចថតរូបបានដោយលឿននិងរហ័ស។ ទាំងនេះគឺសុទតែជាលក្ខណៈពិសេសរបស់កាមេរ៉ាប្រភេទនេះ ប៉ុន្តែអ្នកប្រហែលជាមិនមានបំណងទិញកាមេរ៉ានេះវិញដោយគិតថាកាមេរ៉ាប្រភេទនេះមានតម្លៃរាប់រយឬរាប់ពាន់ដុល្លា។ ជាការពិតណាស់កាមេរ៉ាប្រភេទនេះគឺសំដៅទៅលើទីផ្សាអ្នកឯកទេសជំនាញ វាមានតម្លៃថ្លៃមែនព្រោះវាមានភ្លាប់មុខងារជាច្រើនដែលពួកគាត់ត្រូវការក្នុងការប្រើប្រាស់ជាលក្ខណៈជំនាញរបស់ពួកគាត់ ប៉ុន្តែក្រុមហ៊ុនផលិតកាមេរ៉ាក៏បានផលិតកាមេរ៉ាប្រភេទដូចគ្នាសម្រាប់ទីផ្សាអតិថិជនធម្មតាដែលមានតម្លៃសមរម្យផងដែរ។ Canon EOS 1200D គឺជាកាមេរ៉ាមួយក្នុចំណោមកាមេរ៉ានៅក្នុងទីផ្សានោះ។

ដោយមានតម្លៃត្រឹមតែ $299 កាមេរ៉ានេះបានទទួលការគាំទ្រជាច្រើនពីអ្នកទើបតែចាប់ផ្ដើមក្នុងការថតរូប និងអ្នកដែលមិនចង់ចំណាយប្រាក់ច្រើនទៅលើកាមេរ៉ាប៉ុន្តែចង់មានលទ្ធភាពបត់បែនបានខ្លាំជាមួយកាមេរ៉ាដែលអាចផ្លាស់ផ្ដូរកញ្ចក់មុខកើត។

អ្វីដែលខ្ញុំចូលចិត្តក្នុងកាមេរ៉ានេះ ៖

ផ្លាស់ប្តូរកញ្ចក់មុខកើត។ នៅពេលចង់ផ្លាស់ប្តូរស្តាយថតយើងអាចទិញកញ្ចក់មុខថ្មីដោយមិនចាំបាច់ផ្លាស់ប្តូរកាមេរ៉ាទាំងមូល។
អាចផ្លាស់ប្តូរការកំណត់ (setting) ក្នុងការថតរូបបានគ្រប់យ៉ាង។ ដោយយើងមានលទ្ធភាពគ្រប់គ្រងលើមុខងារទាំងនេះ (manual control) យើងអាចគ្រប់គ្រងលើលទ្ធផលរូបភាពយើងបានទាំងស្រុង តាមគំនិតច្នៃប្រឌិតរបស់យើង។
ទំហំសិនស័រធំ (សូមកុំច្រឡំជាមួយចំនួនមេហ្កាភិចសែល) ដូចនេះរូបភាពដែលកាមេរ៉ានេះចាប់បានមានមានលក្ខណៈច្បាស់ល្អ សូម្បីតែថតក្នុងកន្លែងងងឹត។ បន្ថែមពីលើនេះទៀត ដោយសិនស័រមានទំហំធំ វាបើកឲ្យយើងមានលទ្ធភាពអាចធ្វើឲ្យផ្ទៃខាងក្រោយ (background) របស់រូបភាពយើងព្រិលខ្លាំងបាន (bokeh)។

Model: សត្វឆ្មា (រក្សាសិទ្ធគ្រប់យ៉ាង ហាមការប្រើប្រាស់រូបភាពនេះដោយគ្មានការអនុញាតិជាលាយលក្ខណ៍អក្សរពី model នៅក្នុងរូបនេះ)

ចំនួនមេហ្កាភិចសេលគ្រប់គ្រាន់ ចំពោះការបង្ហោះរូបភាពនៅលើបណ្ដាញអ៊ិនធឺណេត និងផ្តិតរូបទំហំធំ។
អាចភ្ជាប់ flash ខាងក្រៅបាន។ លទ្ធភាពអាចភ្ជាប់ flash បាន អាចបង្កើនលទ្ធភាពរបស់អ្នកប្រើប្រាស់បើកឲ្យពួកគាត់បង្កើនស្តាយថតរូបបានកាន់តែច្រើន។
អាចឆ្លុះមើលរូបភាពពីក្នុងក្នុងកញ្ចក់បានបើរអេក្រង់ខាងក្រៅចាំងខ្លាំងពេក ជាពិសេសពេលថតរូបនៅខាងក្រៅដែលមានពន្លឺភ្លឺខ្លាំង។
អាចថតរូបបានជាឯកសារប្រភេទ RAW ដោយមិនមានការបាត់បង់គុណភាពរូបភាពដូច ប្រភេទឯកសារ JPEG ទេ។ ឯកសារប្រភេទ RAW អាចបើកលទ្ធភាពឲ្យអ្នកថតរូប edit រូបបានទាំងស្រុងដោយមិនមានការបាត់បង់គុណភាពរូបភាពដោយ ការបង្ហាប់ឯកសារ (file compression) ដូចមានក្នុងរូបភាពប្រភេទ JPEG ទេ។
មាន flash នៅលើតួកាមេរ៉ាស្រាប់។ សម្រាប់ពេលអ្នកនៅកន្លែងងងឹតខ្លាំងប៉ុន្តែមិនមាន ឬមិនបានយក flash ខាងក្រៅមកតាមខ្លួន។
អាចមានមុខងារកាត់របន្ថយភាពរង្គើដោយការញ័រដៃ (បើកញ្ចក់កាមេរ៉ាអ្នកមានមុខងារនេះ) ។
រាងតូចងាយនឹងដាក់ចូលកាបូប ហើយមានទំហំស្រាល។ ល្អសម្រាប់មនុស្សដែលមានដៃតូច និងមិនចង់ស្ពាយរបស់ធ្ងន់និងធំជាប់ខ្លួន។
អាចថតវីដេអូបាន FullHD (1920 x 1080) @30fps ទំហំស្តង់ដាក្នុងទីផ្សាបច្ចុប្បន្ន។
តម្លៃថោក (មិនចាំបាច់បកស្រាយច្រើន)។

Nikon Coolpix P530

តម្លៃនៅទីផ្សាប្រទេសកម្ពុជា $269 (យោងតាមហាងលក់កាមេរ៉ា Camera Hub)

អ្នកអាចចង់បានកាមេរ៉ាដែលមានរូបរាងដូចកាមេរ៉ាប្រភេទ dSLR ដែរប៉ុន្តែមិនចង់រញ៉េរញ៉ៃនិងចំណាយពេលនិងថវិការច្រើនទៅលើកញ្ចក់កាមេរ៉ា។ អ្នកចង់បានកាមេរ៉ាសម្រាប់ថតរូបមានគ្រប់ស្ថានភាពដោយមានគុណភាពរូបភាពល្មម (មិនអន់ដូចកាមេរ៉ាទូរស័ព្ទ ប៉ុន្តែមិនល្អដូច dSLR បំពាក់ដោយកញ្ចក់ថ្លៃនិងមានគុណភាពល្អ)។ រួមទាំងលទ្ធភាព zoom ចូលជិតបានដល់ទៅ 42 ដង ធ្វើឲ្យកាមេរ៉ានេះបានទទួលការគាំទ្រជាច្រើនពីសំណាក់ទីផ្សា ~~paparazzi~~ អ្នកថតរូប។

អ្វីដែលខ្ញុំចូលចិត្តក្នុងកាមេរ៉ានេះ ៖

optical zoom បានដល់ទៅ 42 ដង អ្នកអាចថតរូបជិតបានដោយមិនចាំបាច់ដើរ (ឬក៏ហោះបើអ្នកថតរូបឡើងលើដូចជាសត្វចាបឬយន្តហោះ) ទៅជិតអ្វីដែលអ្នកថត។
អាចផ្លាស់ប្តូរការកំណត់ (setting) ក្នុងការថតរូបបានគ្រប់យ៉ាង។ ដោយយើងមានលទ្ធភាពគ្រប់គ្រងលើមុខងារទាំងនេះ យើងអាចគ្រប់គ្រងលើលទ្ធផលរូបភាពយើងបានទាំងស្រុងជាមួយ manual control (បើយើងយល់ពីទ្រឹស្តីទាំងនេះ) ។
អាចថតរូបបានជាឯកសារប្រភេទ RAW ដោយមិនមានការបាត់បង់គុណភាពរូបភាពដូច ប្រភេទឯកសារ JPEG ទេ។ ឯកសារប្រភេទ RAW អាចបើកលទ្ធភាពឲ្យអ្នកថតរូប edit រូបបានទាំងស្រុងដោយមិនមានការបាត់បង់គុណភាពរូបភាពដោយ ការបង្ហាប់ឯកសារ (file compression) ដូចមានក្នុងរូបភាពប្រភេទ JPEG ទេ។
អាចឆ្លុះមើលក្នុងអេក្រង់ខាងក្នុងបានបើរអេក្រង់ខាងក្រៅចាំងខ្លាំងពេកជាពិសេសពេលថតរូបនៅខាងក្រៅដែលមានពន្លឺចាំងភ្លឺខ្លាំង។
មានមុខងារកាត់បន្ថយភាពរង្គើដែលបណ្ដាលមកពីការញ័រដៃ។
មិនចាំបាច់ចំណាយថវិកាសម្រាប់កញ្ចក់ក្រោយពីទិញកាមេរ៉ានេះ។
ចំនួនមេហ្កាភិចសេលគ្រប់គ្រាន់ ចំពោះការបង្ហោះរូបភាពនៅលើបណ្ដាញអ៊ិនធឺណេត និងផ្តិតរូបទំហំធំ។
ថតបានរូបភាព 7 ប៉ុស្តិ៍ក្នុងមួយវិនាទី ល្អសម្រាប់អ្នកថតរូបដែលមានចលនាលឿន
មាន flash នៅលើតួកាមេរ៉ាស្រាប់។ សម្រាប់ពេលអ្នកនៅកន្លែងងងឹតខ្លាំង។
ថតវីដេអូ FullHD បានក្នុង 30fps។ គ្រប់គ្រាន់សម្រាប់ស្ថានភាពធម្មតាគ្រប់យ៉ាង។
ទំហំតូចល្មមនិងមានទម្ងន់ល្មម។
តម្លៃថោក។

Casio ZR3500

តម្លៃនៅទីផ្សាប្រទេសកម្ពុជា $299 (យោងតាមហាងលក់កាមេរ៉ា Camera Hub)

ក្រោយពី CASIO ប៉ុន្មានឆ្នាំមុនបានបន្ថែមមុខងារ ដំណើរការកែរប្រែរស្បែកឲ្យមើលទៅរលូនក្នុងរូបភាពមក (Make-up mode) កាមេរ៉ាម៉ាក CASIO បានទទួលការគាំទ្រពីសំណាក់អ្នកថត selfie យ៉ាងខ្លាំង ជាពិសេសនារីៗដែលចង់ថត selfie បានស្អាតនិងផ្លែកជាងការថត selfie ដោយប្រើប្រាស់ទូរស័ព្ទធម្មតា។ កាមេរ៉ាម៉ូដែលនេះមានរាងតូចងាយនឹងដាក់ចូលកាបូបយួរដៃនិងអាចបង្វិលអេក្រង់ឡើងឲ្យមើលរូបភាពបានពីខាមុខកាមេរ៉ា ហើយមានទំហំស្រាលងាយនឹងយកតាមខ្លួន។ រួមជាមួយប៊ូតុងថតទីពីរដែលមានទីតាំងនៅផ្នែកខាងមុខកាមេរ៉ា វាធ្វើឲ្យការថត selfie ជាមួយកាមេរ៉ានេះកាន់តែមានភាពងាយស្រួលទៀត។ កាមេរ៉ានេះមិនពេញនិយមសម្រាប់បុរសៗទេ ប៉ុន្តែបើអ្នកមិនដឹងថាទិញអ្វីជាកាដូខួបកំណើត ឬកាដូថ្ងៃបុណ្យណូអែលជូនមិត្តស្រីរបស់អ្នកទេនោះ អ្នកពុំចាំបាច់មើលទៅអ្វីក្រៅពីកាមេរ៉ានេះទេ។

អ្វីដែលខ្ញុំចូលចិត្តក្នុងកាមេរ៉ានេះ ៖

selfie កាន់តែល្អដោយមានមុខងារ Make-up Plus mode ។
មាន Wi-Fi។ អ្នកអាចបញ្ជូនរូបភាពដែលអ្នកថតដោយកាមេរ៉ានេះចូលក្នុងទូរស័ព្ទបានដោយងាយស្រួលនិងឆាប់រហ័ស និងមិនចាំបាច់ត្រូវការកុំព្យូទ័រ។ ថែមទាំងអាចកំណត់ឲ្យបញ្ចូនរូបភាពទៅទូរស័ព្ទបានដោយស្វ័យប្រវត្តិទៀតផង។
មានមុខងារ edit រូបភាពក្នុងកាមេរ៉ាជាច្រើន និងមាន filter ស្រាប់។
អាច zoom បាន។
តូច និង ស្រាល។ ងាយនឹងដាក់ក្នុងហោប៉ៅ ឬ កាបូប។
ថតរូបបានភ្លឺ និងមានគុណភាពល្អ បើប្រៀបធៀបទៅនឹងកាមេរ៉ាលើទូរស័ព្ទ។
អាចបង្វិលអេក្រង់ឲ្យមើលបានពីមុខ។
មាន flash ភ្ជាប់ជាមួយកាមេរ៉ាស្រាប់។
ព័ណ៌ផ្កាឈូក !!!

Canon PowerShot SX710 HS

តម្លៃនៅទីផ្សាប្រទេសកម្ពុជា $288 (យោងតាមហាងលក់កាមេរ៉ា Camera Hub)

PowerShot SX710 HS គឺជាកាមេរ៉ាប្រភេទ Compact ប៉ុន្តែអាចផ្តល់គុណភាពរូបភាពបានល្អនិងមានមុខងារថតរូបជាច្រើន។ ថ្វីត្បិតតែកាមេរ៉ានេះតូចមែនប៉ុន្តែអ្នកអាច zoom ចូលបាន 30 ដងឯណោះ។

អ្វីដែលខ្ញុំចូលចិត្តក្នុងកាមេរ៉ានេះ ៖

អាចផ្លាស់ប្តូរការកំណត់ (setting) ក្នុងការថតរូបបានគ្រប់យ៉ាង។ ដោយយើងមានលទ្ធភាពគ្រប់គ្រងលើមុខងារទាំងនេះ យើងអាចគ្រប់គ្រងលើលទ្ធផលរូបភាពយើងបាន (manual control) ។
អាចថតរូបបានជាឯកសារប្រភេទ RAW ដោយមិនមានការបាត់បង់គុណភាពរូបភាពដូច ប្រភេទឯកសារ JPEG ទេ។
មានមុខអាចកាត់បន្ថយភាពរង្គើក្នុងរូបភាពដោយការញ័រដៃ។
optical zoom បានដល់ទៅ 30 ដង។
មាន Wi-Fi។ អ្នកអាចបញ្ជូនរូបភាពដែលអ្នកថតដោយកាមេរ៉ានេះចូលក្នុងទូរស័ព្ទបានដោយងាយស្រួលនិងឆាប់រហ័ស និងមិនចាំបាច់ត្រូវការកុំព្យូទ័រ។
មានមុខងារដំណើរការច្រើន។
មាន flash ភ្ជាប់ជាមួយកាមេរ៉ាស្រាប់។
តូច និង ស្រាល។

Canon PowerShot S110

តម្លៃនៅទីផ្សាប្រទេសកម្ពុជា $249 (យោងតាមហាងលក់កាមេរ៉ា Camera Hub)

សម្រាប់អ្នកដែលចង់មានកាមេរ៉ាតូចងាយយកតាមខ្លួនឬដាក់ក្នុងហោប៉ៅបាន និងអាចថតរូបបានក្នុងស្ថានភាពជាច្រើន ដោយមានគុណភាពល្អជាងកាមេរ៉ាក្នុងទូរស័ព្ទ ហើយមានតម្លៃសមរម្យនោះកាមេរ៉ាមួយនេះគឺសម្រាប់អ្នក។

អ្វីដែលខ្ញុំចូលចិត្តក្នុងកាមេរ៉ានេះ ៖

អេក្រង់ Touchscreen
អាចថតរូបបានជាឯកសារប្រភេទ RAW ដោយមិនមានការបាត់បង់គុណភាពរូបភាពដូច ប្រភេទឯកសារ JPEG ទេ។
មាន Wi-Fi។ អ្នកអាចបញ្ជូនរូបភាពដែលអ្នកថតដោយកាមេរ៉ានេះចូលក្នុងទូរស័ព្ទបានដោយងាយស្រួលនិងឆាប់រហ័ស និងមិនចាំបាច់ត្រូវការកុំព្យូទ័រ។
មាន flash ភ្ជាប់ជាមួយកាមេរ៉ាស្រាប់។
មានមុខអាចកាត់បន្ថយភាពរង្គើក្នុងរូបភាពបណ្ដាលមកពីការញ័រដៃ។
តូច និង ស្រាល។ ងាយស្រួលយកតាមខ្លួន។

GoPro

តម្លៃនៅទីផ្សាប្រទេសកម្ពុជា $299 (យោងតាមហាងលក់កាមេរ៉ា Camera Hub)

សព្វថ្ងៃនេះយើងសង្កេតឃើញថាមានការពេញនិយមទៅលើកាមេរ៉ាសម្រាប់ថតសកម្មភាពដូចជាកីឡានិងការផ្សងព្រេងផ្សេងៗ ដែលកាមេរ៉ាប្រភេទនោះអាចផ្តល់មុខងារដែលកាមេរ៉ាប្រភេទផ្សេងៗមិនអាចផ្តល់ឲ្យ។ មុខងារទាំងនោះមានដូចជា សម្បកការពារកុំឲ្យធ្លាក់បែកបាក់កាមេរ៉ា និងការពារកុំឲ្យទឹកចូល។ ហើយមានរាងតូច និងអាចបំពាក់លើខ្លួនឬយានជំនិះដោយប្រើគ្រឿងបំពាក់ជាដើម។ កាមេរ៉ា GoPro គឺជាកាមេរ៉ាដែលមានភាពជោគជ័យខ្លាំងជាងគេក្នុងចំណោមម៉ាកកាមេរ៉ាប្រភេទនេះ។ ហើយថ្មីៗនេះ GoPro បាន ទម្លាក់តម្លៃកាមេរ៉ា ពី $399 មកត្រឹម $299 ដូចនេះខ្ញុំក៏សម្រេចចិត្តរាប់កាមេរ៉ានេះចូលក្នុងអត្ថបទមួយនេះដែរ។ សូមបញ្ជាក់ថា កាមេរ៉ាប្រភេទនេះគឺសម្រាប់អ្នកត្រូវការថតវីដេអូច្រើនជាងថតរូបភាព។

អ្វីដែលខ្ញុំចូលចិត្តក្នុងកាមេរ៉ានេះ ៖

មានសម្បករឹងមាំការពារធ្លាក់និងការពារទឹក។
តូច និង ស្រាល។ ហើយអាចបំពាក់លើខ្លួន យានជំនិះ និងអ្វីផ្សេងៗជាច្រើនទៀត។
ថតក្នុងទឹកបាន។ ដូចនេះរូបភាពដែលថតបានវាមានលក្ខណៈពិសេសប្លែកពីរូបភាពដទៃទៀត។
ក្រុមហ៊ុនផលិតកាមេរ៉ានេះបាន ផ្តល់ជូនគ្រឿងបន្ថែមយ៉ាងច្រើននៅក្នុងទីផ្សាសម្រាប់បំពាក់បន្ថែមពីលើកាមេរ៉ានេះ។
អាចបញ្ជាកាមេរ៉ានេះបានតាមទូរស័ព្ទ។
ថតវីដេអូ slow-motion បានដល់ទៅ 120fps (ប្រមាណ 5 ដងយឺតជាងល្បឿនពិត)។

សរុបទៅ…

ទាំងនេះជាកាមេរ៉ាខ្លះដែលពួកខ្ញុំលើកយកមកវិភាគក្នុងអត្ថបទនេះជាការផ្តល់យោបល់សម្រាប់អ្នកអានគ្រប់គ្នាដែលមានបំណងចង់ទិញកាមេរ៉ាដែលមិនមានតម្លៃថ្លៃប៉ុន្តែមិនដឹងថាត្រូវទិញកាមេរ៉ាមួយណាទើបសមនឹងការប្រើប្រាស់របស់ពួកគាត់។ ខ្ញុំសង្ឃឹមថាអត្ថបទនេះអាចបំភ្លឺពួកគាត់។ ជម្រើសនិងយោបល់នៅក្នុងអត្ថបទនេះគឺសុទ្ធតែជាជម្រើសផ្ទាល់របស់ខ្ញុំយោងតាមបទពិសោធន៍ទៅលើជំនាញថតរូបផ្ទាល់របស់ខ្ញុំក្នុងរយៈពេលប៉ុន្មានឆ្នាំនេះ រួមជាមួយទិន្ន័យពីទីផ្សាបច្ចុប្បន្ន។ បើនៅមានសំណួរអ្វីផ្សេងទៀតអ្នកអាចទុក comment នៅខាងក្រោម។

Khmer isn’t my first language so please excuse any mistake I made in the article (or any article I will write in the future). ;p
I mean, seriously, guys. Spare me the misspelling comments.

អានបន្ត

Like 2512

ជម្រើសកាមេរ៉ា DSLR សំរាប់អ្នកទើបតែប្រើដំបូង

បច្ចេកវិទ្យា

08/11/2015

ពួកយើងបានសង្កេតឃើញថា ប្រទេសកម្ពុជាយើងបានកំពុងតែកើនឡើងនូវអ្នកប្រើប្រាស់កាមេរ៉ា DSLR វាជារឿងមួយដែលល្អ ព្រោះវាធ្វើអោយប្រទេសយើងបានរីកចំរើននូវការផលិតរូបភាពតាមការថតរូប។ ប៉ុន្តែក៏មានអ្នកខ្លះដែលមិនទាន់បានជ្រាបអំពីការប្រើប្រាស់ និង ប្រភេទកាមេរ៉ាណាដែលល្អសំរាប់គេជាអ្នករៀនដំបូង ភាគច្រើនគឺនៅលើទំព័រ Facebook មានមនុស្សមួយចំនួនដែលបានសួរទៅអ្នកឯកទេសខាងថតរូប។ ដូច្នេះពួកយើងបានលើកយកនូវអត្ថបទមួយនេះដើម្បីបង្ហាញពីជម្រើស កាមេរ៉ាខ្លះដែលលោកអ្នកអាចទិញប្រើបាន។ ខាងក្រោមនេះជាជម្រើសកាម៉េរា DSLR សំរាប់អ្នកចង់រៀនថតរូបលើកដំបូងដែលមានតំលៃសមរម្យ។

Nikon D3300

តម្លៃនៅទីផ្សាប្រទេសកម្ពុជាប្រហែល $360 ភ្ជាប់ជាមួយ Kit Lens Nikkor AF-S 18-55mm ƒ/3.5-5.6 VR (យោងតាមហាងលក់កាមេរ៉ា Camera Hub)

Nikon D3300 ជាប្រភេទកាមេរ៉ា DSLR មួយដែលចេញនៅឆ្នាំ 2014
ទំហំ Sensor របស់វាគឺ 24 មេហ្កាភិចស៊េល
អាចថតបានចំនួន 5 រូបភាពក្នុង 1 វិនាទី
ISO អាចដំឡើងដល់ 25600
អាចថតវីដេអូបាន ទំហំ 1080p 60fps
បន្ទុកថ្មអាចថតបានប្រហែល 700 រូបភាពទើបអស់។

ដកស្រង់ពីគេហទំព័រ nikon

Nikon D5300

តម្លៃនៅទីផ្សាប្រទេសកម្ពុជាប្រហែល $599 ជាមួយនឹង Kit lens Nikkor AF-S 18-105mm ƒ/3.5-5.6 ED VR (យោងតាមហាងលក់កាមេរ៉ា Camera Hub)

Nikon D5300 ជាប្រភេទកាមេរ៉ា DSLR មួយដែលចេញនៅឆ្នាំ 2013
ទំហំ Sensor របស់វាគឺ 24 មេហ្កាភិចស៊េល
គ្មាន AA filter ដូច្នេះវាអាចធ្វើអោយរូបភាព របស់អ្នកមានលក្ខណះច្បាស់ជាងមុន។
មានចំនុច autofocus ដល់ទៅ 39 អាចអោយអ្នក focus ដោយមិនចាំយូរ។
អាចថតបានចំនួន 5 រូបភាពក្នុង1 វិនាទី
ISO អាចដំឡើងដល់ 25600
អាចថតវីដេអូបាន ទំហំ 1080p 60fps
បន្ទុកថ្មអាចថតបានប្រហែល 600 រូបភាពទើបអស់។
មានអេក្រង់ពណ៌ច្បាស់ល្អ អាចបង្វិលចុះឡើងបាន មាន wifi និង GPS នៅក្នុងកាមេរ៉ាតែម្តង អ្នកអាចថតភ្លាមហើយទាញចូលក្នុងទូរស័ព្ទដៃអ្នកភ្លាមក៏បាន(សំរាប់អ្នកចូលចិត្ត post រូបភាព)។

ដកស្រង់ពីគេហទំព័រ nikon

Nikon D5500

តម្លៃនៅទីផ្សាប្រទេសកម្ពុជាប្រហែល $599 ភ្ជាប់ជាមួយ Kit lens Nikkor AF-S 18-55mm ƒ/3.5-5.6G VR II (យោងតាមហាងលក់កាមេរ៉ា Camera Hub)

ជាកាមេរ៉ាជំនាន់ក្រោយបន្ទាប់ពី D5300 specs ភាគច្រើនមានដូចទៅនឹង Nikon D5300 ដែល ប៉ុន្តែមានភាពខុសគ្នាត្រង់ D5500 មានរាងតូចជាង មានអេក្រង់ Touchscreen និង មិនមាន GPS ដូច D5300 ទេ។

ដកស្រង់ពីគេហទំព័រ nikon

Canon 1200D

តម្លៃនៅទីផ្សាប្រទេសកម្ពុជាប្រហែល $299 ភ្ជាប់ជាមួយ Kit lens Canon EF-S 18-55mm ƒ/3.5-5.6 IS STM (យោងតាមហាងលក់កាមេរ៉ា Camera Hub)

ជាប្រភេទកាមេរ៉ា DSLR មួយដែលចេញនៅឆ្នាំ 2014
ទំហំ Sensor របស់វាគឺ 18 មេហ្កាភិចសែល
ISO ធំបំផុតគឺ 6400
មានចំនុច autofocus ដល់ទៅ 9
ថតវីដេអូ បាន1080p 30fps, 720p 60fps
អេក្រង់ភ្លឺច្បាស់ល្អ
បន្ទុកថ្មអាចថតបានប្រហែល 500 រូបភាពទើបអស់។

ដកស្រង់ពីគេហទំព័រ Youtube

Canon 100D

ជាប្រភេទកាមេរ៉ា DSLR មួយដែលចេញនៅឆ្នាំ 2013
ជាកាមេរ៉ាប្រភេទ DSLR ដែលតូចជាងគេបំផុតនិងស្រាលជាងគេបំផុតក្នុងទីផ្សា
ទំហំ Sensor 18 មេហ្កាភិចសែល
ISO ធំបំផុត 12800
មានចំណុច autofocus 9
ថតបាន 4 រូបភាពក្នុង 1 វិនាទី
ថតវីដេអូ បាន1080p 30fps, 720p 60fps
អេក្រង់ភ្លឺច្បាស់ល្អ Touchscreen
បន្ទុកថ្មអាចថតបានប្រហែល 500 រូបភាពទើបអស់។

Canon 750D/760D

ភ្ជាប់ជាមួយ Kit Lens Canon EF-S 18-55mm ƒ/3.5-5.6 IS STM ម៉ូឌែល 750D មានតម្លៃ $580 ហើយម៉ូឌែល 760D មានតម្លៃ $650 (យោងតាមហាងលក់កាមេរ៉ា Camera Hub)

ជាប្រភេទកាមេរ៉ា DSLR មួយដែលចេញនៅឆ្នាំ 2015
ទំហំ Sensor 24 មេហ្កាភិចសែល
ISO ធំបំផុត 25600
មានចំនុច autofocus ដល់ទៅ 19 , Hybrid CMOS AF III
ថតវីដេអូ បាន1080p 30fps, 720p 60fps
អេក្រង់ភ្លឺច្បាស់ល្អ និង Touchscreen
បន្ទុកថ្មអាចថតបានប្រហែល 500 រូបភាពទើបអស់
សម្រាប់ម៉ូឌែល 760D មាន LCD នៅផ្នែកខាងលើ ដែលបង្ហាញពីទិន្ន័យនៃការថតរូបរបស់កាមេរ៉ា

ទាំងនេះគឺជាជម្រើសកាមេរ៉ាប្រភេទ DSLR ដែលពួកខ្ញុំជឿថាជាជម្រើសល្អពីក្នុងទីផ្សារសព្វថ្ងៃនេះ។ ចំពោះចំនួនមេហ្កាភិចសែល (Megapixel/MP) របស់សិនស័រវិញអ្នកមិនបាច់ពិចារណាច្រើនពេកពីលើនោះទេ ពួកយើងភាគច្រើនគឺគ្រាន់តែថតរូបដើម្បីបង្លោះនៅក្នុងបណ្តាញសង្គមក្នុង Internet តែប៉ុណ្នោះ ហើយពួកយើងមិនត្រូវការផ្ដិតរូបទំហំធំទេ ចំពោះការប្រើប្រាស់ដូចនេះ សិនស័រត្រឹមតែ 5 មេហ្កាផិចស៊េលវាគ្រប់គ្រាន់ស្រាប់ទៅហើយ។ ម៉្យាងទៀតបើអ្នកនៅក្នុងចំណោមមនុស្សភាគតិចដែលផ្ដិតរូបទំហំធំវិញនោះ សម្រាប់កាមេរ៉ាខាងលើ រវាង18MP ឬ 24MP វាមិនមែនជាការខុសគ្នាច្រើនខ្លាំពេកនោះទេ។

ចំពោះអ្នកដែលប្រើកាមេរ៉ាត្រៀមនឹងថតវីដេអូច្រើន អ្នកគួតែជ្រើសរើសយកកាមេរ៉ាដែលអាចថតវីដេអូ 1080p។

កាមេរ៉ា DSLR ខាងលើមិនមានមុខងារច្រើនដូច DSLR ដែលបង្កើតដើម្បីអ្នកឯកទេសជំនាញទេ ប៉ុន្តែអ្នកត្រូវដឹងថានេះជាការទិញកាមេរ៉ា DSLR ដំបូងរបស់អ្នក ហើយមនុស្សមួយចំនួនធំដែលទើបតែចាប់ផ្តើមប្រើប្រាស់ DSLR គឺមិនត្រូវការកាមេរ៉ាមានមុខងារច្រើនដូចអ្នកឯកទេសជំនាញនោះទេ។ នេះគឺជាការដាក់ទុនលើកដំបូងរបស់អ្នកក្នុងការថតរូបលក្ខណៈកម្រិតខ្ពស់ ប៉ុន្តែអ្នកមិនប្រាកដថាអ្នកនឹងចូលចិត្តវិស័យនេះហើយបន្តជំនាញនេះទេ ដូចនេះអ្នកគួរតែដាក់ទុនបន្តិចបន្តួចទៅលើជំនាញនេះសិនបានហើយ ព្រោះថាវាអាចមានឧបស័គ្គ ឬ កត្តាខ្លះដែលជំរុញឲ្យអ្នកបោះបង់ជំនាញនេះវិញ ហើយបើអ្នកចំណាយតិចទៅលើឧបករណ៍ថតរូប អ្នកនឹងមិនខាតបង់ថវិកាច្រើនទេ។ ម៉្យាងវិញទៀតបើអ្នកត្រូវការឧបករណ៍ផ្សេងៗទៀតអ្នកអាចទិញបន្ថែមបានគ្រប់ពេល។ ខ្ញុំផ្ទាល់ធ្លាប់ស្គាល់មនុស្សមួយចំនួនដែលចំណាញប្រាក់យ៉ាងច្រើនទៅលើកាមេរ៉ា DSLR ដំបូងរបស់ពួកគាត់ ប៉ុន្តែមិនបានប៉ុន្មានខែផងគាត់ចង់លក់កាមេរ៉ារបស់គាត់វិញ ព្រោះគាត់មានអារម្មណ៍ថា ថតរូបដោយ DSLR មានភាពលំបាក និងហត់ជាងការថតរូបធម្មតា (ដោយកាមេរ៉ាទូរស័ព្ទរបស់គាត់) ហើយការលក់ឧបករណ៍ទាំងនោះចេញវិញមានការខាតជាថវិកាយ៉ាងច្រើន។

កត្តាមួយទៀតដែលអ្នកត្រូវចាំទៅលើការជ្រើសរើសឧបករណ៍ថតរូបរបស់អ្នកគឺអ្នកគួតែយល់ថាកញ្ចក់ (lens) វាសំខាន់ជាងតួកាមេរ៉ា។ តួកាមេរ៉ានឹងហួសសម័យឬខូចក្នុងពេលប៉ុន្មានឆ្នាំក្រោយ ប៉ុន្តែកញ្ចក់កាមេរ៉ាអាចនៅជាមួយអ្នកនឹងអាចប្រើប្រាស់បានជាច្រើនឆ្នាំបន្តទៀត។ កញ្ចក់កាមេរ៉ាគឺជាគ្រឿងសំខាន់ជាងគេបំផុតរបស់ប្រព័ន្ធកាមេរ៉ាទាំងមូល។ ប្រើតួការមេរ៉ាតំលៃថោកបំពាក់ជាមួយនឹងកញ្ចក់ថ្លៃល្អមួយ វានឹងឲ្យគុណភាពរូបភាពល្អជាងកាមេរ៉ាតំលៃ $6000 បំពាក់ជាមួយនឹងកញ្ចក់តម្លៃ $200។

ក្នុងអត្ថបទក្រោយៗខ្ញុំត្រៀមនឹងបកស្រាយអំពីលក្ខណៈពិសេសរវាងកាមេរ៉ានីមួយៗ។ ជាបញ្ចប់ខ្ញុំចង់ប្រាប់អ្នកថា ប្រព័ន្ធកាមេរ៉ាថ្លៃយ៉ាងណាក្តី វាមិនសំខាន់ដូចការយល់ដឹងក្នុងការថតរូបរបស់អ្នកថតរូបទេ។ អ្នកគួតែប្រើពេលដើម្បីបង្កើនចំណេះដឹងនិង បទពិសោធន៍ក្នុងការថតរូបរបស់អ្នក វាប្រសើរជាងចំណាយពេលលើការប្រៀបធៀបឧបករណ៍ថតរូបទាំងនេះ។ រីករាយក្នុងការថតរូបទាំងអស់គ្នា!

ការកែតម្រូវ 9/11/2015: បន្ថែមតម្លៃកាមេរ៉ាសម្រាប់កាមេរ៉ានីមួយៗ ។

អានបន្ត

photography Tag Archive

SONY a6300

ជើងកាមេរ៉ា (Tripod)

Lens hood

សំភារៈសំអាត កាមេរ៉ា និង កញ្ចក់

តេលេ (remote shuter)

ភ្លើងបំភ្លឺបំពាក់ខាងក្រៅ (external flash)

AF-S DX NIKKOR 18-55mm f/3.5-5.6G VR II

AF-S DX NIKKOR 35mm f/1.8G

AF-S NIKKOR 50mm f/1.8G

AF-S DX NIKKOR 55-200mm f/4-5.6G ED VR II

Canon EOS 1200D

Nikon Coolpix P530

Casio ZR3500

Canon PowerShot SX710 HS

Canon PowerShot S110

GoPro

សរុបទៅ…

Nikon D3300

Nikon D5300

Nikon D5500

Canon​ 1200D

Canon 100D

Canon 750D/760D

បណ្ដាញសង្គម

ផ្សេងៗ

photography
Tag Archive

Canon 1200D