សម្រាប់អត្ថបទមុនយើងបាននិយាយអំពីការលេចធ្លាយនូវរូបរាងមួយចំនួនរបស់ រថយន្តប្រភេទ Pickup គម្រូរបស់ Mercedes-benz ប៉ុន្តែនៅពេលឥឡូវនេះរថយន្តគម្រូនេះត្រូវបានគេដាក់តាំងបង្ហាញជាសាធារណៈហើយ វាត្រូវបានគេដាក់ឈ្មោះថា Mercedes-benz X-Class ដោយវានឹងត្រូវបានគេចាប់ផ្តើមដាក់លក់នៅក្នុងដំណាច់ឆ្នាំ 2017 ខាងមុខនេះហើយ។
នៅក្នុងពិធីដាក់បង្ហាញរថយន្តនៅប្រទេសស៊ុយអែត Mercedes-benz បានដាក់តាំងបង្ហាញនូវរថយន្តគម្រូ មានរចនាបថពីរប្រភេទផ្សេងគ្នា ដែលដំណាងឲ្យ Mercedes-benz X-Class។ ដែលរថយន្តប្រភេទទីមួយមានឈ្មោះថា Stylish Explorer ដោយវាមានរចនាបថបែបស៊ីវីល័យ ជាមួយកង់ដែលមានយ៉ាន់ធំបូករួមនឹងសំបកកង់ដែលស្តើងបែបលក្ខណៈស្ព័រ និងចង្គៀងខាងក្រោយប្រភេទ LED ជាលក្ខណៈភ្លើងខ្សែដែលមានរាងបែបចតុកោណ។ ចំណែកឯប្រភេទទីពីរវិញគឺមានឈ្មោះថា Powerful Adventurer ដោយវាត្រូវបានគេរចនាម៉ូដបែបជាលក្ខណៈរថយន្ត Off road ចំតួរតែម្តង មិនថាតែកង់ ឬគែមៗនៃជំវិញរថយន្តនោះទេ មើលទៅវាពិតជារឹងមាំ និងធន់ខ្លាំងណាស់។ រថយន្តទាំងពីរម៉ូដនេះសុទ្ធតែជាប្រភេទរថយន្ត Pickup ដែលមានទ្វាបួន មានកៅអីពីរជួរ អាចផ្ទុកចំនួនមនុស្សបាន 5 អ្នក និងជាមួយនឹងបាំងខាងក្រោយរាងខ្លីបន្តិច។
សម្រាប់ផ្នែកខាងក្នុងវិញ រថយន្ត Mercedes-benz X-Class ត្រូវបានអ្នកផលិតយកចិត្តទុកដាក់ក្នុងការតុបតែង ធ្វើយ៉ាងណាឲ្យវាពោrពេញទៅដោយគុណភាព និងមានលក្ខណៈសាកសមឥតខ្ចោះ ដូចទៅនឹងរថយន្ត Mercedes-benz ម៉ូដែលដ៏ទៃៗទៀតដែរ។
នៅត្រង់ផ្នែកម៉ាស៊ីនវិញ គឺវាដូចទៅនឹងអ្វីដែលយើងធ្លាប់បានបង្ហើបប្រាប់ទៅដល់ប្រិយមិត្តទាំងអស់គ្នា នៅក្នុងអត្ថបទមុន “ក្រុមហ៊ុន Mercedes- Benz គ្រោងនឹងធ្វើការបង្ហាញនូវរថយន្ត Pickup គម្រូរបស់ខ្លួនឆាប់ៗខាងមុខនេះ“អញ្ចឹង គឺរថយន្ត Mercedes-benz X-Class នឹងត្រូវបានបំពាក់មកជាមួយនូវប្រភេទម៉ាស៊ីនម៉ាស៊ូត Bluetec turbodiesel V6 3.0L ជាមួយនឹងការបើកបរដោយប្រព័ន្ធវិលកង់ទាំងបួន All wheels Drive។