តើអ្នកធ្លាប់មាន ឬធ្លាប់បានប្រើប្រាស់ ឬក៏ធ្លាប់បានឃើញកាមេរ៉ា drone ពីមុនមកដែរឬទេ? បើសិនជាអ្នកធ្លាប់ តើអ្នកគិតយ៉ាងណាដែរ ចំពោះការបញ្ជារកាមេរ៉ា drone នោះ, ពិបាក ឬក៏ងាយស្រួល? ហើយចំពោះអ្នកដែលមិនធ្លាប់បានប្រើប្រាស់កាមេរ៉ា drone ខ្ញុំគិតថាអ្នកទាំងអស់គ្នាប្រហែលជាគិតថា វាមានការលំបាកណាស់ក្នុងការបញ្ជារ drone នោះ ដើម្បីថតយករូបភាពឲ្យបានស្រស់ស្អាតពីលើអាកាស ហើយបើអ្នកបានដឹងថែមទៀតថា មានការធ្លាក់កាមេរ៉ា drone នេះជាច្រើនសូម្បីតែអ្នកជំនាញបញ្ជារវាក៏ដោយ អ្នកនឹងគិតថាវាកាន់តែពិបាកបញ្ជារ និងត្រូវការការចេះដឹងច្រើនដើម្បីបញ្ជារវាជាមិនខាន។ ក៏ប៉ុន្តែ ឥឡូវនេះជាមួយនឹងកាមេរ៉ា drone ថ្មីរបស់ក្រុមហ៊ុន DJI ដែលមានឈ្មោះថា Phantom 4 ដែលជា upgrade ថ្មីរបស់ Phantom 3 និងទើបប្រកាសចេញលក់ជាផ្លូវការកាលពី ថ្ងៃទី ០៣ ខែមិនា ២០១៦ ថ្មីៗនេះ អ្នកមិនចាំបាច់ត្រូវការចេះអ្វីច្រើនដើម្បីបញ្ជារវានោះទេ ព្រោះវាមានបំពាក់មកជាមួយនឹងប្រព័ន្ធដ៏អស្ចារ្យដែលអាចហោះហើរ និងចេះគេចនូវឧបសគ្គដែលនៅពីមុខវាបានដោយខ្លួនឯង ក៏ដូចជាមុខងារជាច្រើនទៀតដែរអាចឲ្យអ្នកថតរូបពីលើអាកាសបានដូចជាអ្នកជំនាញអញ្ជឹង។ នៅអត្ថបទនេះ ខ្ញុំនឹងរៀបពីលក្ខណៈពិសេសៗរបស់កាមេរ៉ា drone ម៉ាក Phantom 4 នេះ។
Phantom 4 គឺជាកាមេរ៉ា drone មួយក្នុងចំណោម drone ជាច្រើនរបស់ក្រុមហ៊ុន DJI ដែលវាជាកាមេរ៉ា drone ស័ក្តសមសម្រាប់អ្នកថតរូប ទាំងអ្នកផ្ដើមហើយចង់ក្លាយជាអ្នកជំនាញ និងអ្នកជំនាញផ្ទាល់។ Phantom 4 គឺជា upgrade របស់ Phantom 3 ដែលតែងតែទទួលបានការគាំទ្រជាច្រើនពីសំណាក់អ្នកជំនាញថតរូបជាច្រើននៅលើពីភពលោក ហើយវាមានមុខងារអាចហោះហើរខ្លួនឯងបានដោយអ្នកគ្រាន់តែចុចនូវប៊ូតុងខ្លះ, អាចគេចនូវឧបសគ្គដែលនៅពីមុខវាបានដោយស្វ័យប្រវត្តិ, និងអាចបង្វិលតាមរបស់ដែលអ្នកចង់ឲ្យវាតាមថតបានដោយខ្លួនឯងជាមួយនឹងមុខងារ Active Track។
មិនដូចជាប្រព័ន្ធហោះហើរដោយស្វ័យប្រវត្តិផ្សេងៗដែលហោះតាមអ្វីដែលយើងកំនត់ឲ្យនោះទេ តែ Phantom 4 គឺហោះហើរដោយស្វ័យប្រវត្តិ រួមទាំងកំនត់នូវផ្លូវដែលវាគួរហោះដោយខ្លួនវាផ្ទាល់យោងតាមអ្វីដែលវាមើលឃើញនៅពីមុខវា។ Phantom 4 មានកាមេរ៉ាចំនួន 5 បំពាក់លើខ្លួនរបស់វា ដែលក្នុងនោះ មានមួយជាកាមេរ៉ា 4k ចម្បង ដែលអ្នកប្រើសម្រាប់ថតរូបភាព ឬវីដេអូផ្ទាល់, ពីរកាមេរ៉ានៅចំពីមុខ និងពីរកាមេរ៉ាទៀតនៅពីក្រោមតួរខ្លួនវា។ ជាមួយនឹងកាមេរ៉ាទាំងនេះ Phantom 4 អាចបង្កើតជារូបភាព 3D នៃបរិស្ថានដែលនៅជុំវិញខ្លួនវា ហើយប្រើប្រាស់ទិន្នន័យទាំងនោះដើម្បីធ្វើការកំនត់ផ្លូវដែលវាគួរហោះ ហើយវាអាចមើលឃើញឧបសគ្គដែលនៅពីមុខវាបានដល់ទៅ 15 ម៉ែត្រ។ ការដែលវាចេះមើលឃើញពីឧបសគ្គជាមួយនឹង Obstacle Sensing System ដែលនៅពីមុខវានេះ គឺធ្វើឲ្យការបង្ហោះ drone កាន់តែមានសុវត្ថិភាព និងមិនងាយធ្លាក់ដូចពីមុននោះទេ។
ជាមួយនឹងមុខងារ Active Track ថ្មី អ្នកអាចថតរូបបានដូចជាអ្នកជំនាញ ដោយ Phantom 4 អាចតាមថតនូវរបស់មានចលនា ឬមនុស្ស ដែលអ្នកកំនត់ឲ្យវាតាមថតបាន ដោយមិនឲ្យរបស់ឬមនុស្សនោះចេញក្រៅ frame នោះទេ។ ហើយអ្នកអាចដូរឲ្យវាទៅ focus លើរបស់ផ្សេងបានដោយគ្រាន់តែចុចនៅលើអេក្រង់របស់ទូរស័ព្ទ ឬ tablet ដែលអ្នកភ្ជាប់សម្រាប់បញ្ជារវាតែប៉ុណ្ណោះ នោះវានឹងធ្វើការថតថ្មីលើរបស់នោះ។
ជាពិសេសជាងនេះទៅទៀតនោះ អ្នកអាចបញ្ជារ drone ម៉ាក Phantom 4 នេះបានដល់ទៅ 28 នាទី យូរជាងម៉ូដែលមុនៗដែលបានត្រឹមតែ 15-20 នាទីតែប៉ុណ្ណោះ។ ហើយអ្នកអាចបញ្ជារវាឲ្យហោះឆ្ងាយពីអ្នកបានដល់ទៅ 5 គីឡូម៉ែត្រ (Km) ហើយនៅតែអាចមើលរូបភាព 720p HD ពីកាមេរ៉ា drone របស់អ្នកនៅលើអេក្រង់បញ្ជារបាន។ បន្ថែមពីនេះផងដែរ Phantom 4 ក៏មាននូវមុខងារ (Mode) ជាច្រើនឲ្យអ្នកជ្រើសរើសដើម្បីធ្វើការបញ្ជារវាបានផងដែរ ក្នុងនោះ ជាមួយនឹង Sport Mode អ្នកអាចបញ្ជារឲ្យវាហោះក្នុងល្បឿនយ៉ាងលឿន គឺអាចបានល្បឿនដល់ទៅ 72 គីឡូម៉ែត្រក្នុងមួយម៉ោង (Km/h) ឯណោះ។ លើសពីនេះ Phantom 4 ត្រូវបានឌីហ្សាញឡើងសារជាថ្មី និងមានស្នូលរបស់វាធ្វើពី magnesium ដែលអាចធ្វើឲ្យវាហោះហើរបានយ៉ាងនឹងល្អ មិនសូវរង្គើរខ្លាំងដូចម៉ូដែលមុនៗនោះទេ។
ចំពោះកាមេរ៉ាដែលបំពាក់នៅលើ Phantom 4 នេះ វាគឺជា កាមេរ៉ា 4K ដែលបំពាក់ជាមួយនឹងជើងរក្សារលំនឹងបីអ័ក្ស (integrated 3-axis gimbal) ដែលអាចធ្វើឲ្យវាថតរូបបានយ៉ាងនឹង និងរលូនល្អមិនសូវរង្គើរខ្លាំង ហើយវាមានសិនស័រទំហំ 1/2.3-inch (អ៊ីញ) ដែលមាន ISO អាចឡើងបានរហូតដល់ទៅ 1600 សម្រាប់ថតរូបភាព និង ISO 3200 សម្រាប់ថតវីដេអូ។ ចំពោះវីដេអូ Phantom 4 អាចថតបានទំហំ 4K ក្នុងល្បឿន 30fps និងបានទំហំ Full HD 1080p ក្នុងល្បឿន 120fps សម្រាប់បង្កើតជាវីដេអូ slow motion។ ពិសេសជាងនេះ រូបភាពដែលថតមកអាច save ជា Adobe DNG RAW ហើយវីដេអូ ក៏អាច save ជា flat profiles ដូចជា D-log និង Cine-D ដែលជា profile អ្នកជំនាញថតរឿងខ្នាតធំៗជាច្រើនប្រើប្រាស់សម្រាប់ថតគុន។
ខាងក្រោមគឺជាវីដេអូ ដែលក្រុមហ៊ុន DJI បានធ្វើការណែនាំអំពី Phantom 4៖
ហើយខាងក្រោមនេះ គឺជាការចែករំលែកបទពិសោធន៍របស់អ្នកដែលបានប្រើប្រាស់ Phantom 4៖