ក្រុមហ៊ុន Nvidia ទើបតែប្រកាសចេញនូវ GPU ជំនាន់ថ្មីរបស់ពួកគេ ដែលមានឥទ្ធិពលខ្លាំងជាង GPU flagship ជំនាន់មុនរបស់ពួកគេ, GTX Titan X និង GTX 980 Ti, ហើយស៊ីភ្លើងតិចជាងមុនត្រឹមតែ 180W និងមានបន្ថែមនូវមុខងារពិសេសៗជាច្រើនទៀតសម្រាប់តម្រូវជាមួយនឹងបច្ចេកវិទ្យាហ្គែមសម័យថ្មីដូចជា VR ហើយពិសេសជាងនេះនោះ គឺវានឹងមានតម្លៃថោកនៅពេលចេញលក់ដំបូងជាងតម្លៃរបស់ GPU flagship ជំនាន់មុនកាលពីចេញលក់ដំបូងទៀត។ GPU ថ្មីរបស់ក្រុមហ៊ុន Nvidia នេះគឺ GeForce GTX 1080 និង GeForce GTX 1070 ដែលមានឥទ្ធិពលខ្លាំង ដែលនឹងធ្វើឲ្យអ្នកមានការភ្ញាក់ផ្អើលជាខ្លាំង។
Nvidia GeForce GTX 1080 និង Nvidia GeForce GTX 1070 គឺជាក្រាហ្វិកកាតជំនាន់ថ្មីរបស់ក្រុមហ៊ុន Nvidia ដែលប្រើប្រាស់ស្ថាបត្យកម្មបន្ទះឈីប Pascal (Pascal Architecture) ដែលជាបច្ចេកវិទ្យាឈីបជំនាន់ថ្មីបន្តពី ស្ថាបត្យកម្ម Maxwell (Maxwell Architecture) ដែលបានប្រើនៅក្នុង GTX Titan X និង GTX 980 Ti។
បូករួមបន្ថែមនូវមុខងារ ការដំណើរការដ៏ល្អប្រសើរ និងឥទ្ធិពលដ៏ខ្លាំងនោះ GeForce GTX 1080 និង GeForce GTX 1070 នឹងមានភ្ជាប់មកជាមួយនូវមុខងារថ្មីចំនួនបី ដែលនឹងធ្វើឲ្យបទពិសោធន៍នៃការលេងហ្គែមរបស់អ្នកកាន់តែប្រសើរឡើង ជាពិសេស VR Games ដែលជាបច្ចេកវិទ្យា flatform ហ្គែមស៊េរីថ្មីកំពុងតែល្បីនាពេលបច្ចុប្បន្ន ហើយមុខងារទាំងបីនោះមានដូចជា Ansel ដែលជាមុខងារថ្មីសម្រាប់ចាប់យករូបភាពនៅក្នុងហ្គែមដែលអ្នកលេង, Nvidia VR Works Audio សម្រាប់ធ្វើឲ្យសម្លេងនៅក្នុងហ្គែមដូចសម្លេងមែនទែននៅខាងក្រៅ និង Simultaneous Multi-Projection ដែលមានប្រយោជន៍សម្រាប់អ្នកដែលប្រើប្រាស់អេក្រង់ 2 ឬ 3 ឬច្រើនជាងនេះសម្រាប់លេងហ្គែម ឬធ្វើការឌីហ្សាញរបស់ផ្សេងៗ។
Ansel ឧបករណ៍សម្រាប់ចាប់យករូបភាពនៅក្នុងហ្គែម (Tool for taking in-game screenshot)
Ansel គឺជាឧបករណ៍សម្រាប់ចាប់យករូបភាពពីក្នុងហ្គែមដែលអ្នកលេង។ ខុសពីឧបករណ៍ ឬមុខងារ screenshot ធម្មតាផ្សេងៗ Ansel ត្រូវបានដាក់ភ្ជាប់ផ្ទាល់ទៅនឹងម៉ាស៊ីនរបស់ហ្គែម (game engine) ដែលអ្នក developer របស់ហ្គែមដាក់បញ្ចូល អនុញ្ញាតឲ្យអ្នកលេងអាចបញ្ជារឲ្យទៅដល់ទីណាក៏បាននៅក្នុងហ្គែម ហើយអាចធ្វើការកាត់ និងថតចាប់យកទិដ្ឋភាពនៅទីនោះ ហើយដាក់ filter ពីលើបានយ៉ាងស្រួល ជាមួយនឹងរូបភាពដែលមាន resolution ខ្ពស់ជាង resolution របស់អេក្រង់របស់អ្នកទៅទៀត គឺអាចចាប់យករូបភាពដែលមានទំហំដល់ទៅ 61,000 ភិចស៊ែលឯណោះបើអ្នកចង់។
ហើយជាពិសេសជាងនេះផងដែរ អ្នកក៏អាចធ្វើការចាប់យករូបភាពពីក្នុងហ្គែមមួយចំនួនជា 360 ដឺក្រេបានផងដែរ ដើម្បីមើលនៅក្នុង VR headsets ដូចជា HTC Vive ឬក៏តាម Nvidia Android app ជាមួយនឹង Google Cardboard។ ហើយហ្គែមដែលអ្នកអាចប្រើប្រាស់ជាមួយមុខងារ Ansel នេះបាននៅពេលដែលចេញមកមានដូចជា The Division, The Witcher 3, The Witness, Law Breakers, Paragon និង No Man’s Sky ជាដើម។
Nvidia VR Works Audio
Nvidia VR Works Audio នេះគឺជាមុខងារថ្មីដែលបង្កើននូវបទពិសោធន៍នៃការស្ដាប់សម្លេងនៅក្នុងហ្គែម ដោយវាអាចធ្វើឲ្យសម្លេងនៅក្នុងហ្គែមកាន់តែដូចជាសម្លេងមែនទែននៅខាងក្រៅ នៅពេលដែលវាលងទៅមកជាមួយនឹងរបស់ដែលនៅក្នុងហ្គែមនោះ។ Nvidia បានធ្វើឲ្យវាស្គាល់ពីរូបរាងរបស់របរ និងផ្ទៃជញ្ជាំងដែលនៅក្នុងហ្គែម និងធ្វើឲ្យសម្លេងដែលទៅប៉ះនឹងរបស់ទាំងនោះ ហើយលាន់សូរមកត្រចៀកអ្នកវិញ ដូចជាសម្លេងដែលអ្នកលើក្នុងពិភពពិតខាងក្រៅ។ ដើម្បីបង្ហាញពីមុខងារ Nvidia VR Works Audio នេះ ក្រុមហ៊ុន Nvidia បានបង្កើតនូវ minigames ជាច្រើន ដែលមាននៅក្នុង The Nvidia VR Funhouse សម្រាប់ឲ្យអ្នកប្រើដោយឥតគិតថ្លៃជាមួយ HTC Vive។
VIDEO
Simultaneous Multi-Projection
ចំពោះមុខងារ Simultaneous Multi-Projection នេះវិញ គឺវាមានប្រយោជន៍សម្រាប់អ្នកប្រើប្រាស់អេក្រង់ចាប់ពី 2 ឡើងទៅសម្រាប់លេងហ្គែម និង Virtual Reality (VR)។ មុខងារនេះ គឺជាមុខងារថ្មីដែលមាននៅក្នុង Pascal ក្រាហ្វិកកាត ដែលមានសមត្ថភាពអាចបង្ហាញនូវរូបភាពនៅលើអេក្រង់បានដល់ទៅ 16 viewpoints ផ្សេងៗគ្នាក្នុងពេលតែមួយ។ សម្រាប់ក្រាហ្វិកកាតជំនាន់មុនៗ គឺអាចបង្ហាញរូបភាពបានត្រឹមតែ 1 viewpoint ដែលជាអ្វីដែលអ្នកប្រើអាចមើលឃើញនៅលើអេក្រង់ធម្មតាតែមួយ ក៏ប៉ុន្តែវាអាចជាបញ្ហាសម្រាប់អ្នកដែលប្រើប្រាស់អេក្រង់ 2 ឬ 3 សម្រាប់លេងហ្គែម និងអាចជាបញ្ហាសម្រាប់បច្ចេកវិទ្យា VRផងដែរ។ បើសិនជាអ្នករៀបអេក្រង់ 3 ជាប់គ្នាសម្រាប់លេងហ្គែមជាមួយនឹងក្រាហ្វិកកាតធម្មតា ហើយអ្នកបត់អេក្រង់ខាងស្ដាំ និងខាងឆ្វេងចូលក្នុងបន្តិចដើម្បីស្រួលមើល នោះអ្នកនឹងមើលឃើញរូបភាពដូចជាទាញៗមិនស្មើព្រោះក្រាហ្វិកកាតនោះបង្ហាញរូបភាពត្រឹមតែ 1 viewpoint ដោយវាគិតថាអ្នករៀបអេក្រង់ទាំង 3 នោះស្របគ្នា។
ក៏ប៉ុន្តែជាមួយនឹងមុខងារ Simultaneous Multi-Projection ថ្មីដែលមាននៅក្នុង GTX 1080 និង GTX 1070 របស់ Nvidia វាអាចកែរូបភាពដែលនៅក្នុងអេក្រង់ខាងស្ដាំ និងខាងឆ្វេងនោះ ឲ្យមានរូបភាពធម្មតាភ្ជាប់គ្នាយ៉ាងល្អឥតខ្ចោះទៅនឹងអេក្រង់កណ្តាល ដោយធ្វើការបង្ហាញនូវរូបភាពជា 3 viewpoints ផ្សេងគ្នា ដែលក្នុងនោះ 2 viewpoints មានការកែតម្រូវរូបភាពនៃភាពបត់បែន។ ហើយបច្ចេកវិទ្យានេះផងដែរ ក៏មានប្រយោជន៍សម្រាប់ការបង្ហាញរូបភាពនៅក្នុង VR ផងដែរ ដោយវាបានធ្វើឲ្យ Frame Rate នៃការបង្ហាញរូបភាពនៅក្នុង VR ឲ្យកាន់តែប្រសើរឡើង និងដើរបានរលូនជាងមុន។
VIDEO
Nvidia GeForce GTX 1080 នឹងមានលក់ក្នុងទីផ្សារនៅថ្ងៃទី 27 ខែឧសភា ក្នុងតម្លៃ $599 ឬអ្នកអាចចំណាយច្រើនជាងនេះបន្តិចដើម្បីទិញ “Founders edition” ពីក្នុងវែបសាយរបស់ Nvidia ផ្ទាល់ ដែលបានរចនាជាពិសេស និងមានឥទ្ធិពលខ្លាំងជាងម៉ូដែលធម្មតាជាមួយនឹង cooler និង overclocking headroom ខ្ពស់ ក្នុងតម្លៃ $699។ រីឯ Nvidia GeForce GTX 1070 វិញ នឹងត្រូវបានចេញលក់នៅក្នុងទីផ្សារក្រោយ GTX 1080 ប្រហែលជាពីរអាទិត្យ គឺនៅថ្ងៃទី 10 ខែមិថុនា ខាងមុខនេះ ក្នុងតម្លៃ $379 និង $449 សម្រាប់ Founders edition។