iPhone 6s ថ្មីដែលទើបនឹងចេញរបស់ក្រុមហ៊ុន Apple និង Samsung Galaxy S6 Edge+ របស់ក្រុមហ៊ុន Samsung គឺជាទូរស័ព្ទដែលល្អជាងគេ និងមានឥទ្ធិពលខ្លាំងជាងគេក្នុងចំណោម smartphone ទាំងអស់ផ្សេងទៀតក្នុងពេលបច្ចុប្បន្ននេះ។ ហើយក្នុងអត្ថបទនេះ ខ្ញុំនឹងធ្វើការប្រៀបធៀបរវាង smartphone ដ៏មានឥទ្ធិពលទាំងពីរនេះ ថាតើវាមានលក្ខណៈសំខាន់ៗខុសគ្នាកន្លែងណាខ្លះ។ ខ្ញុំនឹងធ្វើការប្រៀបធៀបទូរស័ព្ទទាំងពីរទៅលើលក្ខណៈសំខាន់ៗមួយចំនួនដូចជា ការឌីហ្សាញ អេក្រង់ ការដំណើរការ កាមេរ៉ា Operating System ថ្ម និងតម្លៃ របស់ទូរស័ព្ទទាំងពីរនេះ។
ការឌីហ្សាញរបស់ iPhone 6s និង Galaxy S6 Edge+
រូបភាព iPhone 6S។ ដកស្រង់ចេញពីវែបសាយ Apple
ចំពោះ iPhone 6s វាមានរៀងដូចជា iPhone 6 ដែលចេញកាលពីឆ្នាំមុនដែរ ហើយវាមានកម្រាស់ប្រវែង 7.1 មីលីម៉ែត្រ និងមានការឌីហ្សាញបែបស្អាតសាមញ្ញបំផុត។ រីឯ Galaxy S6 Edge+ វិញ វាមានការឌីហ្សាញបែបប្លែកគួរឲ្យចាប់អារម្មណ៍ និងខុសប្លែកពី smartphone ដ៏ទៃទៀតជាមួយនឹងអេក្រង់កោងរបស់វា ហើយវាមានកម្រាស់រៀងស្ដើងជាង iPhone 6s បន្តិច គឺត្រឹមតែ 6.9 មីលីម៉ែត្រប៉ុណ្ណោះ។
រូបភាព Samsung Galaxy S6 Edge+។ ដកស្រង់ចេញពីវែបសាយ GSMArena
អេក្រង់របស់ iPhone 6s និង Galaxy S6 Edge+
រូបភាព iPhone 6S
iPhone 6s មានអេក្រង់ទំហំ 4.7 អ៊ីញ ដូចជា iPhone 6 ដែរ ហើយមានភិចស៊ែលសរុបចំនួន 1,000,500 ភិចស៊ែល (1334 x 750 ភិចស៊េល) ដែលត្រូវនឹងចំនួន 326 ភិចស៊ែលក្នុងមួយអ៊ីញ។ iPhone 6s ក៏មានបន្ថែមនូវបច្ចេកវិទ្យាថ្មីទៅលើអេក្រង់របស់វាផងដែរ នោះគឺ 3D Touch ដែលអាចវាស់ដឹងពីកម្លាំងសង្កត់នៅលើអេក្រង់ និងអាចបង្កើតឲ្យមានវិធីថ្មីជាច្រើនក្នុងការចុចលើអេក្រង់បាន ដែលទូរស័ព្ទផ្សេងៗទៀតជាមួយនឹង Multitouch ដូចគ្នាមិនមាន។ ប្រសិនបើអ្នកចង់ដឹងកាន់តែច្បាស់អំពី iPhone 6s សូមចុចលើ Link នេះ។
រូបភាព Galaxy S6 Edge+។ ដកស្រង់ចេញពីវែបសាយ Samsung
រីឯ Samsung Galaxy S6 Edge+ វិញ វាមានទំហំអេក្រង់ដល់ទៅ 5.7 អ៊ីញ ជាមួយនឹង 3,686,400 ភិចស៊ែល (2560 x 1440 ភិចស៊ែល) ដែលត្រូវនឹងចំនួន 518 ភិចស៊ែលក្នុងមួយអ៊ីញ ហើយមើលទៅមានរូបភាពស្រស់ស្អាតច្បាស់ល្អ។ បន្ថែមពីនេះទៀត អេក្រង់របស់ Galaxy S6 Edge+ ត្រូវបានធ្វើឲ្យមានកំណោងនៅសងខាងអេក្រង់របស់វាផងដែរ ដែលមើលទៅមិនត្រឹមតែមានលក្ខណៈប្លែកជាងទូរស័ព្ទដ៏ទៃដែលមានត្រឹមតែអេក្រង់រាបស្មើរប៉ុណ្នោះទេ ហើយវាក៏មានភ្ជាប់មកជាមួយលក្ខណៈ និងមុខងារពិសេសថ្មីៗបន្ថែមផងដែរសម្រាប់ប្រើនៅកន្លែងកោងរបស់វានោះ ដូចជាអ្នកអាចមើល Notification និង សារថ្មីៗបាននៅលើកន្លែងកោងនៃអេក្រង់នោះបានដោយមិនចាំបាច់បើកអេក្រង់ឲ្យភ្លឺជាដើម។
ដោយមានមកជាមួយនូវបច្ចេកវិទ្យាថ្មីរបស់ អេក្រង់ Super AMOLED បានធ្វើឲ្យ Galaxy S6 Edge+ អាចបញ្ចេញនូវរូបភាពដែលមានពណ៌ចម្រុះស្រស់ស្អាតច្បាស់ល្អ រីឯ iPhone 6s វិញ ជាមួយនឹងអេក្រង់ IPS LCD របស់វា អាចធ្វើឲ្យវាបញ្ចេញនូវពណ៌ដែលមានលក្ខណៈធម្មជាតិជាង។
ការដំណើរការរបស់ iPhone 6s និង Galaxy S6 Edge+
iPhone 6s មានភ្ជាប់មកជាមួយនូវ 64-bit Apple A9 processor ថ្មី ដែលអាចធ្វើឲ្យទូរស័ព្ទនេះមានឥទ្ធិពលខ្លាំងជាងម៉ូដែលមុនៗរបស់វាដល់ទៅ 70% ខាងផ្នែក CPU និង 90% ខាងផ្នែក GPU, ដូចគ្នាផងដែរ ជាមួយនឹង 64-Bit Octa-core (2.1GHz Quad + 1.5GHz Quad) Exynos 7420 processor និង 4GB RAM, Galaxy S6 Edge+ ក៏មានឥទ្ធិពលខ្លាំងផងដែរ។ យើងជឿថា ទូរស័ព្ទទាំងពីរនេះអាចផ្ដល់នូវបទពិសោធន៍ដ៏ល្អ ជូនដល់អ្នកប្រើប្រាស់បានស្រដៀងគ្នា ហើយកម្លាំងនៃការ processing របស់ទូរស័ព្ទទាំងពីរនេះគឺមិនមែនជាបញ្ហាទៀតឡើយ។
កាមេរ៉ារបស់ iPhone 6s និង Galaxy S6 Edge+
រូបភាព iPhone 6S ពេលថតវីដេអូ។ ដកស្រង់ចេញពីវែបសាយ techadvisor
iPhone 6s មានកាមេរ៉ាក្រោយ ដែលមានទំហំមេហ្គាភិចស៊ែលដល់ទៅ 12MP ធំជាង iPhone 6 កាមេរ៉ា ដែលមានត្រឹមតែ 8MP ហើយកាមេរ៉ាមុខរបស់វាមានទំហំមេហ្គាភិចស៊ែលចំនួន 5MP ដដែល។ យើងជឿថា កាមេរ៉ារបស់ iPhone 6s នឹងអាចថតរូបដ៏ច្បាស់ល្អដូចជា iPhone 6 ដែរព្រោះវាជា upgrade របស់ iPhone 6 កាមេរ៉ា ហើយក៏ប្រហែលជាល្អជាងផង។ កាមេរ៉ារបស់ iPhone 6s ក៏អាចថតជា 4K វីដេអូ និង Live Photo បានផងដែរ។
រូបភាព Galaxy S6 Edge+ ពេលថតវីដេអូ។ ដកស្រង់ចេញពីវែបសាយ Samsung
ចំពោះ Galaxy S6 Edge+ វិញ កាមេរ៉ារបស់វាពិតជាអាចថតរូបបានល្អស្រស់ស្អាតច្បាស់ល្អមែន ជាមួយនឹងកាមេរ៉ាក្រោយ ដែលមានទំហំមេហ្គាភិចស៊ែលដល់ទៅ 16MP មានភ្ជាប់មកជាមួយនឹង optical image stabilisation ដែលអាចថតរូបបានយ៉ាងលឿន និងមិនញ័រ ហើយកាមេរ៉ាមុខរបស់វាក៏មានទំហំមេហ្គាភិចស៊ែលដូច iPhone 6s ផងដែរគឺ 5MP។
Operating System (OS) របស់ iPhone 6s និង Galaxy S6 Edge+
iPhone 6s មានដំណើរការនៅលើ iOS9 ដែលសរសេរដោយក្រុមហ៊ុន Apple ផ្ទាល់ រីឯ Galaxy S6 Edge+ មានដំណើរការនៅលើ Android OS ដែលសរសេរដោយក្រុមហ៊ុន Google។ បទពិសោធន៍ ដែល OS ទាំងពីរអាចផ្ដល់ជូនអ្នកមានលក្ខណៈខុសគ្នា ដូច្នេះហើយមុននឹងអ្នកសម្រចចិត្តជ្រើសរើសថាគួរយកទូរស័ព្ទមួយណារវាងទូរស័ព្ទ smartphone ទាំងពីរនេះ អ្នកគួរសួរខ្លួនឯងសិនថាតើអ្នកចូលចិត្តបទពិសោធន៍នៃការប្រើប្រាស់ smartphone របស់អ្នកបែបណា។
ចំនួន Apps ដែលមាននៅក្នុង App Store សម្រាប់ iOS និងក្នុង Play Store សម្រាប់ Android ក៏មានភាពខុសគ្នាមួយចំនួនផងដែរ។ ទោះបីជា OS ទាំងពីរមានសម្បូរទៅដោយ Apps ជាច្រើនផ្សេងៗដល់ទៅរាប់លាន Apps ក៏ដោយ ក៏យើងអាចឃើញថា iOS អាចផ្ដល់ជូនអ្នកនូវ Apps ដែលមានគុណភាពល្អៗបានច្រើនជាង Android Apps ដែរ តែអ្នកក៏ត្រូវចំណាយលុយទិញ Apps ភាគច្រើនទាំងនោះនៅក្នុង iOS ជាងក្នុង Android ផងដែរ។ លើសពីនេះ Android បានបើក Codes របស់ពួកគេជាសាធារណៈសម្រាប់ Developers ជាច្រើនធ្វើការកែ interface របស់វា និងកែអ្វីផ្សេងៗទៀតដែល Android អនុញ្ញាតឲ្យកែបាន ដូច្នេះអ្នកអាចជ្រើសរើស Themes ជាច្រើនសម្រាប់ Galaxy S6 Edge+ របស់អ្នកបានតាមតម្រូវចិត្តរបស់អ្នកជាមួយនឹង Android OS ក៏ប៉ុន្តែអ្នកមិនអាចធ្វើបែបនេះបានទេជាមួយ iOS។ ពិសេសជាងនេះ Smartphone ទាំងពីរនេះសុទ្ធតែមានមុខងារដើម្បីស្កេនម្រាមដៃ ដែលជារបស់មានប្រយោជន៍នៅក្នុងសម័យថ្មីនេះ ដូចគ្នា។
ថ្មរបស់ iPhone 6s និង Galaxy S6 Edge+
ចំពោះថ្មរបស់ iPhone 6s វាអាចកាន់ថ្មបានដល់ទៅជិតមួយថ្ងៃពេញដោយអ្នកមិនចាំបាច់ភ័យព្រួួយរឿងអស់ថ្មនៅពាក់កណ្តាលថ្ងៃនោះទេ តែផ្ទុយទៅវិញ ចំពោះ Samsung Galaxy S6 Edge+ ដែលដូចជាទូរស័ព្ទ Samsung ភាគច្រើនដែរ គឺវាឆាប់ស៊ីថ្ម និងមិនសូវកាន់បានដល់ពេញមួយថ្ងៃនោះទេ។
ជាមួយថ្មរបស់ iPhone 6s អ្នកអាចនិយាយបានរហូតដល់ទៅ ១៤ ម៉ោងតាមរយៈ 3G និងអាចប្រើប្រាស់ Internet បានដល់ទៅ ១០ ម៉ោងតាមរយៈ 3G និង LTE និងបានដល់ទៅ ១១ ម៉ោងតាមរយៈ WiFi។ ចំពោះ Samsung Galaxy S6 Edge+ ដើម្បីដោះស្រាយពីបញ្ហាឆាប់អស់ថ្មរបស់ទូរស័ព្ទនេះ ក្រុមហ៊ុន Samsung បានបង្កើតឲ្យមានមុខងារ Fast Charge ហើយជាមួយនឹងមុខងារនេះ អ្នកអាចសាកថ្មរបស់ Galaxy S6 Edge+ អ្នកបានយ៉ាងលឿនឆាប់ពេញ។ ហើយអ្នកក៏អាចរកទិញបាននូវ Wireless Charger និង Power Bank ដែលក្រុម Samsung ឌីហ្សាញជាពិសេសសម្រាប់ទូរស័ព្ទ Samsung សម័យថ្មីនេះ ដើម្បីឲ្យការប្រើប្រាស់ smartphone របស់អ្នកកាន់តែងាយស្រួល។
រូបភាព Samsung Wireless Charger។ ដកស្រង់ចេញពីវែបសាយ Samsung
រូបភាព Samsung Fact Charge (Power Bank)។ ដកស្រង់ចេញពីវែបសាយ Samsung
តម្លៃរបស់ iPhone 6s និង Galaxy S6 Edge+
ដោយសារតែ iPhone 6s មិនទាន់មានវត្តមានក្នុងទីផ្សារនៅប្រទេសកម្ពុជា ខ្ញុំនឹងធ្វើការប្រៀបធៀបតម្លៃរបស់ smartphone ទាំងពីរនេះជាតម្លៃនៅក្នុងប្រទេសអាមេរិក (តាមរយៈក្រុមហ៊ុន AT&T) ហើយអ្នកអាចប្រមើរមើលបានថា វាអាចនឹងមានតម្លៃខុសគ្នាប៉ុនណានៅក្នុងប្រទេសកម្ពុជា។ ចំពោះ iPhone 6s 64GB វាអាចមានតម្លៃប្រហែល …… នៅឯប្រទេសអាមេរិក រីឯ 64 GB Galaxy S6 Edge+ វិញវាមានតម្លៃប្រហែល $815 និងតិចជាងនេះ $100 សម្រាប់ 32GB បើអ្នកទិញពីក្រុមហ៊ុន AT&T ហើយវាអាចមានតម្លៃថ្លៃជាងនេះប្រហែល $50 បើអ្នកទិញនៅក្រុមហ៊ុនផ្សេងទៀត។
ជាទីបញ្ចប់នេះ តាមរយៈការប្រៀបធៀបខាងលើ iPhone 6s និង Samsung Galaxy S6 Edge+ គឺសុទ្ធតែមានឥទ្ធិពលខ្លាំង និងចំនុចល្អរៀងៗខ្លួន ធ្វើឲ្យយើងពិបាកក្នុងការសម្រេចចិត្តថាគួរយកមួយណាណាស់។ តាមយោបល់របស់ខ្ញុំ ដើម្បីជ្រើសរើសយកមួយរវាងទូរស័ព្ទទាំងពីរនេះបើសិនជាគេឲ្យជម្រើសអ្នកនោះ អ្នកគួរគិតថាតើអ្នកចូលចិត្តបទពិសោធន៍ក្នុងការប្រើប្រាស់ smartphone របស់អ្នកបែបណា។ បើអ្នកចូល iOS និងការឌីហ្សាញបែបសាមញ្ញស្អាត និងមានថ្មអាចកាន់បានដល់ទៅមួយថ្ងៃពេញ អ្នកគួរជ្រើសយក iPhone 6s តែបើអ្នកចូលចិត្ត Adroid និងការឌីហ្សាញបែបប្លែកគួរឲ្យចាប់អារម្មណ៍ និងមិនសូវប្រកាន់ពីថ្មរបស់វានោះ អ្នកគួរជ្រើសរើសយក Galaxy S6 Edge+។
