នៅពេលដែលយើងនិយាយអំពីរថយន្ត មានម៉ាក និង ប្រភេទរថយន្តជាច្រើនកំពុងតែដាក់លក់នៅលើទីផ្សារ ហើយក្រុមហ៊ុនដែលផលិតរថយន្តទាំងអស់នោះទៀតសោធ តែងតែផលិតនូវប្រភេទរថយន្ដដែលអាចតំរូវទៅតាមភាពពេញនិយម និង តំរូវការរបស់អតិថិជន។ សំរាប់សុភាពនារីភាគច្រើនតែងចូលចិត្តរថយន្តដែលមានរូបរាងតូចច្រឡឹង ស្រស់ស្អាត ងាយស្រួលបើកបរ និង សំខាន់បំផុតនោះគឺស៊ីសាំងតិចតែម្តង។
សំរាប់អត្ថបទនេះពួកខ្ញុំបានជ្រើសរើសម៉ូដែលរថយន្តមួយចំនួនដែលសាកសម្យ និង ជាទីពេញចិត្តរបស់សុភាពនារីនាពេលបច្ចុប្បន្ន ៈ
Mini Cooper S
Mini គឺជាក្រុមហ៊ុនផលិតរថយន្តមួយរបស់ប្រទេសអង់គ្លេស ហើយគោលដៅរបស់ក្រុមហ៊ុនមួយនេះគឺការបង្កើតប្រភេទរថយន្តទាំងឡាយណាដែលមានរៀងតូចច្រឡឹង ស៊ីវិល័យ មានម៉ាស៊ីនដំណើរការតូច និង គោលដៅចម្បងនោះគឺផ្តោតទៅលើការប្រើប្រាស់សាំងតិចរបស់ម៉ាស៊ីនរថយន្ត។ ភាគច្រើននៃម៉ូដែលរថយន្តរបស់ MINI គឺប្រើប្រាស់ម៉ាស៊ីនដែលមានទំហុំស៊ីឡាំង 1.6L និង 2.0L។ សំរាប់ Mini Cooper S គឺជាម៉ូដែលមួយក្នុងចំណោមម៉ូដែលទាំងអស់របស់ MINI វាគឺជាម៉ូដែលមួយដែលទទួលបានការគាំទ្រជាងគេរបស់ក្រុមហ៊ុន MINI ផងដែរ។ រថយន្តមួយនេះគឺមានត្រូវបានរចនាម៉ូដលក្ខណៈតូចច្រឡឹង ដែលមានទីធ្លារាងតូច ចង្អៀតបន្តិចសំរាប់មនុស្សដែលមានមាឌធំ ប៉ុន្តែសំរាប់សុភាពនារីវិញគឺពិតជាសាកសម្យឥតខ្ចោះតែម្តង។ Mini Cooper S ត្រូវបានបំពាក់មកជាមួយនៅប្រភេទម៉ាស៊ីន I4 Turbo ដែលមានទំហំស៊ីឡាំង 1.6L។ សំរាប់ជំរើសពណ៌វិញ MINI បានផ្តល់ជំរើសជាច្រើនពណ៌ដូចជា ស ខ្មៅ ខៀវ ក្រហម លឿង ប្រផេះ និង បៃតងជាដើម។
Mazda 3
Mazda 3 គឺម៉ូដែលមួយក្នុងចំណោមម៉ូដែលរថយន្តជាច្រើនរបស់ Mazda ដែលបានកែប្រែរូបរាងថ្មី ព្រមទាំងបំពាក់បន្ថែមនូវប្រព័ន្ធ SKYACTIV TECHNOLOGY ដែលជួយឲ្យការចំណាយទៅលើប្រេងឥន្ធនៈរបស់រថយន្តនេះគឺកាន់តែតិច ហើយកាន់តែមានប្រសិទ្ធភាព។ ការកែប្រែរូបរាងថ្មីនេះគឺបានធ្វើឲ្យ Mazda 3 មើលទៅកាន់តែមានភាពទាក់ទាញ និង ទាន់សម័យ ជាមួយនឹងបច្ចែកវិទ្យាទំនើបៗជាច្រើនដែលបានបន្ថែមទៅលើផ្នែកខាងក្រៅ និង ខាងក្នុងរថយន្ត ដែលធ្វើឲ្យការបើកបរកាន់តែមានភាពងាយស្រួល និង កាន់តែមានសុវត្ថភាពផងដែរ។ សំរាប់ម៉ូដែល Mazda 3 យើងមានប្រភេទជំរើសអាចជ្រើសរើសបានពីរគឺ ប្រភេទ Mazda 3 Sedan និង Mazda 3 Hatchback ជាមួយនឹងប្រភេទម៉ាស៊ីន I4 ដែលមានទំហំស៊ីឡាំង 2.0L និង 2.5L ឲ្យអ្នកជ្រើសរើស។ រីឯជំរើសពណ៌រថយន្តក៏មានច្រើនពណ៌ឲ្យអ្នកជ្រើសរើសផងដែរដូចជាព៌ណ ខ្មៅ ស ក្រហម ខៀវ ប្រផេះ និង ប្រាក់ជាដើម។
Lexus CT 200h
CT 200h គឺជាម៉ូដែលរថយន្តប្រណីតមួយដែលមានម៉ាស៊ីនតូចបំផុតរបស់ Lexus។ សំរាប់សុភាពនារី គឺពិតជាសាកសម្យជាមួយរថយន្តនេះខ្លាំងណាស់ ព្រោះតែរូបរាងតូចច្រឡឹងរបស់វា គួបផ្សំជាមួយនឹងភាពឡូយឆាយនៃការរចនាម៉ូដរបស់រថយន្តមួយនេះ ដែលអាចជួយបង្កើនពួកគេនៅភាពទាក់ទាញ និង ថ្លៃថ្នូរមួយកម្រឹតទៀត។ Lexus CT 200h គឺជាជំនាន់ដំបូងបំផុតនៃម៉ូដែល CT ដែលវាបានបំពាក់មកនៅជាមួយប្រភេទម៉ាស៊ីនប្រភេទ I4 ដែលមានទំហំស៊ីឡាំង 1.8L ជាមួយនឹងការបន្ថែមនៅអាគុយ hybrid ជាជំនួយក្នុងការបើកបរ និង ជួយដល់ការកាត់បន្ថយនៅការប្រើប្រាស់សាំងយ៉ាងច្រើន។ ម៉្យាងវិញទៀតយើងក៏អាចជ្រើសរើសពណ៌រថយន្តទៅតាមចំណង់ចំណូលចិត្តរបស់យើងផងដែរ ព្រោះ CT 200h បានផ្តល់ជំរើសពណ៌ជាច្រើនដូចជាពណ៌ ស ខ្មៅ ក្រហម ខៀវ ទឹកប្រាក់ ប្រផេះ និង ពណ៌ត្នោតជាដើម។
TOYOTA Prius
នាពេលថ្មីៗកន្លងមកនេះ Toyota បានចាប់ផ្តើមដាក់បង្ហាញ នូវម៉ូដែល Toyota Prius សំរាប់ឆ្នាំ 2016 ហើយ។ សំរាប់ម៉ូដែលឆ្នាំ 2016 នេះគឺជាជំនាន់ថ្មីរបស់ Toyota Prius ដោយវាបានកែប្រែរូបរាងថ្មីស្រឡាងទាំងស្រុង ទាំងការរចនាម៉ូដខាងក្រៅ និង ខាងក្នុង ដែលធ្វើឲ្យរថយន្តដ៏តូចច្រឡឹងមួយនេះមើលទៅកាន់តែស្អាត និង ទំនើបយ៉ាងខ្លាំង។ ការរចនាម៉ូដថ្មីនេះគឺមានគោលដៅដើម្បីទាក់ទាញអតិថិជនដែលជាសុភាពនារី ជាពិសេសនារីវ័យក្មេង ឲ្យងាកមកគាំទ្រប្រភេទរថយន្ត Prius កាន់តែច្រើន។ សំរាប់ម៉ាស៊ីនដែលនឹងបំពាក់ជាមួយរថយន្ត Toyota Prius គឺជាប្រភេទម៉ាស៊ីន I4 ដែលមានទំហំស៊ីឡាំង 1.8L ជាមួយនឹងអាគុយ hybrid សំរាប់ជាជំនួយនាពេលបើកបរ។ ដូចនេះសុភាពនារីទាំងអស់នឹងមិនមានកង្វល់ក្នុងការចំណាយទៅលើសាំងរថយន្តទៀតឡើយ ដោយសារតែរថយន្ត Toyota Prius ជំនាន់ថ្មីមួយនេះគឺនឹងជួយសន្សំសន្ច័យការចំណាយទៅលើប្រេងឥន្ធនៈរបស់អ្នកបានច្រើន។
ទាំងអស់នេះគឺសុទ្ធសឹងតែជាប្រភេទរថយន្តដែលទទួលបានការគាំទ្រយ៉ាងខ្លាំងពីអ្នកប្រើប្រាស់រថយន្តជុំវិញពិភពលោក។ ក្រៅពីភាពពេញនិយម រថយន្តទាំងអស់នេះក៏មានការរចនាម៉ូដដ៏ស្រស់ស្អាត ស៊ីវិល័យ បូករួមជាមួយនឹងបច្ចេកវិទ្យាដ៏ទំនើប និង សុវត្ថភាពខ្ពស់ផងដែរ។