របៀបនៃការត្រួតពិនិត្យផ្នែកម៉ាស៊ីន និង ខាងក្រោមរថយន្តមុននឹងជ្រើសរើសរថយន្តមួយទឹក

នៅអត្ថបទមុនៗខ្ញុំបានបង្ហាញប្រិយមិត្តទាំងគ្នានូវវិធីសាស្ត្រក្នុងការត្រួតពិនិត្យទៅលើទួល និង ខាងក្នុងរថយន្តមួយទឹក ហើយសំរាប់អត្ថបទនេះខ្ញុំសូមធ្វើការបង្ហាញបន្ថែមដល់ប្រិយមិត្តទាំងអស់គ្នានូវវិធីសាស្ត្រមួយចំនួនក្នុងការត្រួតពិនិត្យទៅលើផ្នែកម៉ាស៊ីន និង ខាងក្រោមរថយន្តមួយទឹក ឬ ប្រើរួច ដើម្បីជួយឲ្យយើងទាំងអស់គ្នាអាចជៀសវាងបាននៅការជ្រើសរើសរថយន្តដែលមានបញ្ហារផ្នែកម៉ាស៊ីន ដែលជាហេតុមួយធ្វើឲ្យយើងត្រូវការចំណាយប្រាក់បន្ថែមជាច្រើនក្នុងការជួសជុលវា។

សូមចុចត្រង់នេះសំរាប់ការពិនិត្យទៅលើរថយន្តកាត់ត

ធ្វើការត្រួតពិនិត្យនៅផ្នែកម៉ាស៊ីនខាងមុខនៃរថយន្ត

ផ្នែកម៉ាស៊ីនខាងមុខនៃរថយន្តគឺជាចំណុចមួយដែលយើងចាំបាច់ត្រូវតែពិនិត្យមុននឹងយើងធ្វើការបើកបរសាកល្បងរថយន្តទាំងនោះ។ ដើម្បីជួយដល់ការពិនិត្យឲ្យបានត្រឹមត្រូវ និង ច្បាស់លាស់យើងត្រូវធ្វើការពិនិត្យនៅកន្លែងដែលមានពន្លឺគ្រប់គ្រាន់ ហើយយើងក៏ត្រូវមានភ្លើងពឹលសំរាប់ជាជំនួយដល់ការត្រួតពិនិត្យរបស់យើងដែរ។ ដើម្បីឲ្យមានសុត្ថិភាពក្នុងពេលត្រួតពិនិត្យអ្នកត្រូវតែធ្វើការពន្លត់ម៉ាស៊ីនរថយន្តជាមុនសិន។ អ្វីដែលយើងគួរតែចាប់អារម្មណ៍នៅពេលដែលយើងបើកគម្របផ្នែកម៉ាស៊ីនខាងមុខនៃរថយន្តនោះភ្លាមគឺ ក្លឹនឈ្ងាមខ្លាំងរបស់ប្រេងម៉ាស៊ីន ឬ ក្លឹនប្រេងរក្សារកំដៅធុងទឹករថយន្តជាដើម ហើយយើងក៏គួរតែធ្វើការចាប់អារម្មណ៍ទៅលើផ្នែកមួយចំនួនដែលធ្លាប់បានធ្វើការជួសជុល ឬ មិនបានធ្វើការថែទាំឲ្យបានត្រឹមត្រូវផងដែរ។ ចំណុចមួយទៀតដែលយើងទាំងអស់គ្នាគួរតែប្រុងប្រយ័ត្ននោះគឺទោះបីជានៅពេលដែលយើងត្រួតពិនិត្យឃើញថាផ្នែកខាងម៉ាស៊ីនរបស់រថយន្តមើលទៅថ្មី ឬ ស្អាតក៏ដោយ វាក៏មិនអាចបញ្ជាក់ថារថយន្តមួយនោះមិនមានបញ្ហារលិចប្រេង ឬ បញ្ហារម៉ាស៊ីនត្រង់កន្លែងផ្សេងៗនោះដែរ។