ក្រុមហ៊ុន Apple នឹងធ្វើសេចក្ដីប្រកាសនៅក្នុងព្រឹត្តិការណ៍ដ៏ធំមួយ ដែលតែងតែធ្លាប់ធ្វើជារៀងរាល់ឆ្នាំ អំពីផលិតផល​ និងកម្មវិធីថ្មីៗរបស់ពួកគេ នៅថ្ងៃទី ០៩ ខែកញ្ញា វេលាម៉ោង ១០ ព្រឹក នៅសាលប្រជុំ Bill Graham Civic ទីក្រុង San Francisco ប្រទេសអាមេរិក។ iPhone 6s, iPhone 6s Plus, iOS9, WatchOS 2 ជាមួយនឹង​ផលិតផល និងកម្មវិធីដ៏អស្ចារ្យផ្សេងៗដ៏ទៃជាច្រើនទៀត គឺជាអ្វីដែលមនុស្សភាគច្រើនរំពឹងទុកថា ក្រុមហ៊ុន Apple នឹងប្រកាសនៅក្នុងថ្ងៃនោះ។

iPhone 6s និង iPhone 6s Plus

រូបភាព iPhone។ ដកស្រង់ពីគេហទំព័រ Yahoo

អ្វីដែលមនុស្សភាគច្រើនរំពឹងទុកខ្លាំងជាងគេថា ក្រុមហ៊ុន Apple នឹងប្រកាសនៅក្នុងព្រឹត្តិការណ៏ដ៏សំខាន់នៅថ្ងៃស្អែកនេះគឺ iPhone 6s និង iPhone 6s Plus ។ ហើយ iPhone ទាំងពីរម៉ូដែលនេះ ក៏នឹងមានភ្ជាប់មកជាមួយ និង​មានការធ្វើឲ្យប្រសើរឡើង នូវ​លក្ខណៈពិសេសៗមួយចំនួនរបស់វាផងដែរ ដូចជា កាមេរ៉ា ១២ Megapixels ដែលច្បាស់ជាងកាមេរ៉ារបស់ iPhone ម៉ូដែលមុនៗ ដែលមានត្រឹមតែ ៨ megapixel, សបក iPhone ដែលក្រាស់ជាងម៉ូដែលមុនៗបន្តិច ដើម្បីចៀសវាងកុំឲ្យងាយបាក់ ឫវៀច (bendgate), និង Force Touch Display ដែលអាចវាស់ដឹងនូវកម្លាំងម្រាមដៃ ដែលអ្នកចុចនៅលើអេក្រង់។

Apple TV

រូបភាព Apple TV។ ដកស្រង់ពីគេហទំព័រ Gizmodo

Apple TV ដែលគេរំពឹងទុកថានឹងមានការកែប្រែធ្វើឲ្យប្រសើរឡើងជាច្រើនឆ្នាំមកហើយនោះ ក៏មានគេទស្សទាយថា នឹងមានការប្រកាស់ផ្លាស់ប្តូរជាច្រើនផងដែរនៅថ្ងៃទី ០៩ ខែកញ្ញានេះ។ គេជឿថា នឹងមានលក្ខណៈពិសេសជាច្រើនដែលត្រូវបានបន្ថែម និងធ្វើឲ្យប្រសើរឡើងទៅលើ Apple TV ដូចជា  processor ដែលល្អជាងមុន, Remote បញ្ចាដែលមាន Touchpad, មានភ្ចាប់មកជាមួយនឹង App Store , អាចផ្ទុកទិន្នន័យបានច្រើនជាងមុន, អាចបញ្ចាតាម Siri ដោយងាយស្រួល និង លក្ខណៈពិសេសផ្សេងៗជាច្រើនទៀត។

iPad Pro

រូបភាព iPad Pro (ត្រូវបានកៃរូបរៀង)។ ដកស្រង់ពីគេហទំព័រ Yahoo

លើសពីនេះទៀត ក៏មានការទស្សទាយ ថាក្រុមហ៊ុន Apple នឹងមានចេញ iPad ថ្មី ដែលហៅថា iPad Pro ដែលមានអេក្រង់ធំ​រហូតដល់ទៅ ១២,៩ អិុញ ធំជាង iPad ផ្សេងៗទៀត ដែលធ្វើឲ្យមានភាពងាយស្រួល ដល់អ្នកដេគ័រ អ្នកឌីហ្សាញ អ្នកជំនួញ និងអ្នកជំនាញផ្សេងៗទៀតប្រើប្រាស់ ជាមួយនឹង Multitasking Feature ដែល ក្រុមហ៊ុន Apple បានធ្វើឲ្យប្រសើរឡើងនៅក្នុង iOS ថ្មីផងដែរ។

iOS 9, OS X El Capitan និង WatchOS 2

រូបភាព Beta របស់ WatchOS 2, OS X El Capitan និង iOS9 ដកស្រង់ពីគេហទំព័រ Slashgear

ខាងផ្នែក Software ក៏មានគេរំពឺងទុកថា នឹង​មានប្រកាសចេញពី Software Updates ថ្មីរបស់ iOS9, OS X El Capitan និង WatchOS 2 ដែល ក្រុមហ៊ុន Apple បានដាក់ឲ្យប្រើជា Beta អស់មួយរយៈនោះផងដែរ។

ដើម្បីឲ្យច្បាស់ថាតើការទស្សទាយ និងការរំពឺងទុករបស់អ្នកគាំទ្រផលិតផល និង សេវាកម្ម របស់ក្រុមហ៊ុន Apple ទាំងអស់ខាងលើពិតត្រឹមត្រូវមែនឫក៏អត់នោះ សូមរងចាំមើលទាំងអស់គ្នា នូវព្រឹត្តិការណ៍ដ៏ពិសេសដែលក្រុមហ៊ុន Apple នឹងធ្វើសេចក្ដីប្រកាសដ៏ធំទៅដល់ពិភពលោកនៅថ្ងៃទី ០៩ ខែកញ្ញានេះ។ ខ្ញុំនឹងសរសេរពី Review អំពីផលិតផលថ្មីៗ ដែលក្រុមហ៊ុន Apple នឹងប្រកាស់ចេញ នៅក្នុងអត្ថបទក្រោយៗរបស់ខ្ញុំ។